Шайгу абвінаваціў НАТА ў падрыхтоўцы нападу на Беларусь і РФ
- 12.02.2026, 20:27
Сакратар Савета бяспекі Расіі сцвярджае, што абстаноўка ля межаў напружаная.
Ля межаў Расіі і Беларусі нібыта склалася «пагрозлівая сітуацыя» з-за дзеянняў краін НАТА па падрыхтоўцы да ўварвання, заявіў сакратар Савета бяспекі Расіі Сяргей Шайгу. «Абстаноўка напружаная, прагноз развіцця — песімістычны… Можна канстатаваць, што альянс фактычна стварае ля расійскіх і беларускіх межаў плацдарм для ваеннай агрэсіі супраць нашых краін», — сказаў ён у размове з «Інтэрфаксам», якая тычылася Арганізацыі Дагавора аб калектыўнай бяспецы (АДКБ).
У пацвярджэнне свайго тэзісу Шайгу прывёў звесткі пра тое, што камандаванне НАТА нібыта правяло ў краінах Балтыі і Польшчы дзевяць вучэнняў за тыдзень з 30 студзеня па 6 лютага. Паводле яго слоў, падчас манеўраў у тым ліку праводзіліся стральбы з РСЗА HIMARS. «Еўрапейскія краіны сталі на шлях мілітарызацыі, нават нягледзячы на складанае становішча ў іх эканоміцы, — заявіў Шайгу. — Нарашчваецца ваенная прысутнасць НАТА, расце колькасць правакацый у паветранай прасторы і на моры, на вучэннях адпрацоўваюцца атакі на тэрыторыю краін — членаў АДКБ».
Ён падкрэсліў, што ў выніку «намерных і сістэмных дзеянняў» Захаду былі разбураныя ключавыя механізмы «забеспячэння стратэгічнай стабільнасці», і заявіў, што Расія, якая пачала найбуйнейшую з часоў Другой сусветнай вайны вайну ў Еўропе, да гэтага не датычная. «Перадумоў для кардынальнага паляпшэння пакуль не прасочваецца», — канстатаваў кіраўнік Савета бяспекі.
На пачатку тыдня Служба знешняй разведкі (СЗР) Расіі заявіла, што заходнія краіны рыхтуюць змену «канстытуцыйнага ладу» ў Беларусі і звяржэнне Аляксандра Лукашэнкі. Паводле версіі ведамства, аперацыя нібыта накіраваная на прэзідэнцкія выбары 2030 года. Свае планы Захад нібыта мае намер рэалізаваць праз пошук у беларускім грамадстве «ліберальных пасіянарыяў». Мэта гэтых дзеянняў — «аслабіць сувязь Мінска і Масквы ў межах «саюзнай дзяржавы» і ўскладніць Расіі дасягненне мэтаў ваеннай аперацыі» ва Украіне, заявілі ў СЗР.