У Польшчы затрымалі восем чалавек па справе аб паветранай кантрабандзе цыгарэт з Беларусі

• 13.02.2026, 12:17

Ім прад’явілі абвінавачанні.

Восем чалавек, якія, як сцвярджаецца, займаліся кантрабандай цыгарэт з Беларусі з дапамогай паветраных шароў, затрымалі супрацоўнікі Падляскага аддзела Памежнай аховы Польшчы.

Па інфармацыі ведамства, гэта чацвёра грамадзян Польшчы ва ўзросце ад 22 да 44 гадоў, а таксама чацвёра грамадзян Літвы ва ўзросце ад 30 да 34 гадоў.

Ім прад’явілі абвінавачанні ў кантрабандзе тытунёвых вырабаў, а таксама паводле закона аб спецыяльных мерах па супрацьдзеянні падтрымцы агрэсіі супраць Украіны. За інкрымінаваныя дзеянні прадугледжана пакаранне ў выглядзе пазбаўлення волі на тэрмін не менш як 3 гады.

Чатыры грамадзяніны Літвы і адзін грамадзянін Польшчы па рашэнні суда арыштаваныя на 3 месяцы, астатнім у якасці меры стрымання прызначаны паліцэйскі нагляд і забарона на выезд з краіны.

Паводле дадзеных ведамства, прыблізны агульны кошт выяўленых з пачатку года цыгарэт, якія былі нелегальна дастаўленыя з Беларусі паветраным шляхам, перавышае 2,8 млн злотых (каля 784 тыс. долараў). Усяго па справе аб паветранай кантрабандзе затрымана 16 чалавек.