Прэзідэнт Фінляндыі: Пуцін ужо пацярпеў стратэгічную паразу ў вайне з Украінай

• 13.02.2026, 22:51

Дыктатар РФ хацеў зрабіць Украіну расійскай — а яна стала еўрапейскай.

Расійскі дыктатар Уладзімір Пуцін пацярпеў стратэгічную паразу і не дасягнуў ніводнай з пастаўленых мэтаў у вайне супраць Украіны.

Пра гэта заявіў прэзідэнт Фінляндыі Аляксандр Стуб падчас выступлення на Мюнхенскай канферэнцыі па бяспецы ў пятніцу, 13 лютага.

«Ён (Пуцін) хацеў зрабіць Украіну расійскай — а яна стала еўрапейскай. Ён хацеў прадухіліць пашырэнне НАТА — а атрымаў уступленне Фінляндыі і Швецыі. Ён хацеў зніжэння нашых выдаткаў на абарону — а яны растуць да 5%», — прыводзіць словы Стуба The Guardian.

Прэзідэнт Фінляндыі адзначыў, што Расія прайграе і ў чыста вайсковым аспекце. У прыватнасці, ён казаў, што тэрытарыяльныя дасягненні акупантаў нязначныя, затое Украіна толькі за адзін месяц — снежань 2025 года — ліквідавала 34 тыс. расійскіх салдат, і расіяне не змаглі кампенсаваць гэтыя страты новым прызывам.

У адказ на пытанне ўкраінскага журналіста, як скарыстацца вопытам Фінляндыі ў барацьбе з РФ, Стуб сказаў: «Я не буду даваць вам парады, але я думаю, што вы выйграеце гэтую вайну».