У Мінску плануюць будаваць развязку на МКАДзе

• 14.02.2026, 3:59

Гэта звязана з ростам буйнага раёна.

Пры будаўніцтве раёна «Паўночны Бераг» плануецца ўзвесці развязку МКАД з вуліцай Нававіленскай. Пра гэта гаварылася падчас нарады ў Мінгарвыканкаме, паведамляе дзяржагенцтва «Мінск-Навіны».

У «Паўночным Беразе» ўжо ўвялі ў эксплуатацыю 16 дамоў, вядуцца працы яшчэ па 25 дамах, будуецца школа з двума басейнамі. Сёлета павінна пачацца ўзвядзенне больш за 40 малапавярховых дамоў.

З-за развіцця жылога комплексу часткова падоўжылі вуліцу Карастоянавай, плануецца будаўніцтва развязкі МКАД — Нававіленская.

«Да пашырэння вул. Карастоянавай і падаўжэння Даўгінаўскага тракту плануем прыступіць у сакавіку–красавіку. Што да развязкі, то да канца года неабходна завяршыць праектную дакументацыю, прайсці экспертызу. У 2027-м прыступім да яе ўзвядзення», — расказаў дырэктар «Гордорстроя» Сяргей Панёў.