«У Пуціна засталося не так шмат часу»

• 14.02.2026, 12:44

Кіраўнік Крамля ў складаным становішчы.

Прэзідэнт Украіны Уладзімір Зяленскі у інтэрв’ю Politico на палях Мюнхенскай канферэнцыі па бяспецы зрабіў некалькі рэзанансных заяў пра Уладзіміра Пуціна і ролю ЗША ў перамовах з РФ.

Гаворачы пра расійскага дыктатара, Зяленскі адзначыў розніцу ва ўзросце і падкрэсліў, што яму 48 гадоў, тады як Пуціну — 73. Паводле слоў украінскага прэзідэнта, гэты фактар мае значэнне.

Ён заявіў, што лічыць сябе вольным чалавекам, які не баіцца адкрытых размоў і гатовы да зменаў пасля завяршэння палітычнай кар’еры. Адначасова ён намякнуў, што ў Пуціна «не так шмат часу», дадаўшы, што гэта, на яго думку, важна ў кантэксце будучыні Расіі.

«Думаю, Пуцін таксама ў складаным становішчы. У яго не так шмат часу», — сказаў украінскі лідар.

Асобна Зяленскі закрануў тэму фактару ЗША. Паводле яго слоў, ад амерыканскага боку і асабіста ад Дональда Трампа паступаюць сігналы пра тое, што прыйшоў час шукаць кампраміс і рухацца наперад.

Пры гэтым ён падкрэсліў, што Украіна ўжо пайшла на сур’ёзныя саступкі. У якасці прыкладу Зяленскі прывёў той факт, што Пуцін і яго атачэнне дагэтуль не прыцягнутыя да адказнасці за шматлікія злачынствы супраць Украіны. Ён назваў гэта самым вялікім кампрамісам, на які, на яго думку, ужо згадзіўся свет.