У Беларусі выпрабоўваюць новыя расійскія дроны

• 14.02.2026, 15:43

Аналітыкі ISW раскрылі падрабязнасці.

Аналітыкі Інстытута вывучэння вайны ISW пацвярджаюць змены лініі фронту, грунтуючыся на геалакаваных кадрах, апублікаваных 12 і 13 лютага.

Паведамляецца, што ўкраінскія сілы нядаўна прасунуліся ў раёне Аляксандраўкі Данецкай вобласці. Відэазапіс ад 13 лютага паказвае, як расійскія аператары дронаў наносяць удары па ўкраінскіх пазіцыях у цэнтральнай частцы пасёлка Атраднае (на поўдзень ад Аляксандраўкі), што сведчыць пра кантроль ЗСУ над гэтай тэрыторыяй.

Таксама ўкраінскія войскі дасягнулі поспехаў у раёне Гуляйполя Запарожскай вобласці. Украінскі вайсковы аглядальнік Канстанцін Машавец паведаміў 12 лютага пра вызваленне населеных пунктаў Дабраполле, Прылукі і Аленаканстанцінаўка, што прымусіла расійскія войскі адступіць на ўсход за трасу Т-0401.

У той жа час расійскія войскі маюць пацверджанае прасоўванне на Славянскім напрамку. Кадры за 12–13 лютага паказваюць, што сілы РФ прасунуліся на паўночны ўсход ад Лімана і ў паўночнай частцы Драбышава.

Эксперты звярнулі ўвагу на актыўнасць у Беларусі. Паведамляецца, што беларускія вайскоўцы працягваюць выпрабоўваць сродкі барацьбы з беспілотнікамі. 13 лютага стала вядома пра выпрабаванні дрона-перахопніка «Малат» расійскай вытворчасці, які запускаецца з ручной прылады. ISW адзначае намаганні Расіі па далейшай інтэграцыі Беларусі ў свае ваенныя структуры.

Аналітыкі таксама адзначаюць маштабную атаку дронаў і ракет па Украіне ў ноч на 13 лютага. Расійскія войскі запусцілі адну балістычную ракету «Іскандэр-М» і 154 беспілотнікі розных тыпаў. Украінская ППА збіла 111 дронаў.