Удар у глыбокі тыл: украінскія дроны паразілі нафтавы тэрмінал у Тамані

• 15.02.2026, 15:45

У Генштабе УСУ раскрылі новыя дэталі атакі.

Сілы беспілотных сістэм УСУ паразілі нафтавы тэрмінал у Краснадарскім краі Расіі. Таксама украінскія дроны знішчылі ЗРГК «Панцыр-С1» у часова акупаваным Крыме.

Пра гэта паведамляе Генеральны штаб УСУ і Сілы беспілотных сістэм.

Як паведамляецца, у ноч на 15 лютага аператары 1-га асобнага цэнтра СБС ва ўзаемадзеянні з ССА і ГУР паразілі экспартны тэрмінал нафты і нафтапрадуктаў «Таманьнафтагаз».

Гэта буйны расійскі экспартны тэрмінал паблізу порта Тамань у Краснадарскім краі.

Аб’ект спецыялізуецца на перавалцы нафты, нафтапрадуктаў і звадкаваных вуглевадародных газаў з рэзервуарных паркаў для далейшай адгрузкі марскімі суднамі.

Тэрмінал забяспечвае функцыянаванне экспартнай інфраструктуры расійскай нафты і падтрымлівае лагістычныя магчымасці Чарнаморскага флоту РФ.

Блізкасць да Крымскага моста і часова акупаванага Крыму ўзмацняе яго ролю ў тылавым забеспячэнні групоўкі праціўніка ў акваторыі Чорнага мора.

У выніку атакі зафіксавана серыя выбухаў. Падрабязныя вынікі паражэння ўдакладняюцца.

Акрамя таго, паводле даных Генштаба, у раёне пасёлка Кача ў Крыме паспяхова паражаны зенітны ракетна-гарматны комплекс «Панцыр-С».

Таксама за мінулыя суткі нанесены ўдары па аб’ектах захопнікаў на іншых напрамках. У прыватнасці, у раёне акупаванага сяла Вольнае Данецкай вобласці паражана рамонтнае падраздзяленне са складу адной з артылерыйскіх брыгад Узброеных Сіл РФ.

А ў раёне акупаванай Любімаўкі Запарожскай вобласці зафіксавана траплянне па раёне канцэнтрацыі жывой сілы акупантаў.

Страты праціўніка і нанесеная ворагу шкода ўдакладняюцца.