Жыхарка Мастоў набрала крэдытаў па ўказцы махляроў

• 15.02.2026, 20:18

Яе ўратавала супрацоўніца аднаго з банкаў.

У Мастах супрацоўніца аднаго з банкаў прадухіліла буйное махлярства. Яна заўважыла нешта нядобрае ў паводзінах кліенткі, якая прыйшла па крэдыт на 26 тысяч рублёў, і пераканала яе не перадаваць грошы злачынцам, паведамляе прэс-служба УУС Гродзенскага аблвыканкама.

Гісторыя пачалася з тэлефоннага званка ў Viber. Невядомы прадставіўся 48-гадовай жанчыне супрацоўнікам «Вадаканала» і сказаў, што тэрмінова трэба мяняць лічыльнікі, а для афармлення дамовы запатрабаваў ідэнтыфікацыйны нумар пашпарта.

Адразу пасля гэтага ў мэсэнджары раздаўся другі званок — на гэты раз нібыта з Нацбанка. Суразмоўца заявіў, што махляры аформілі на жанчыну крэдыт і прапанаваў паўдзельнічаць у «спецаперацыі» па іх затрыманні. Схема была стандартная: ахвяру пераканалі паехаць у Гродна, набраць крэдытаў у розных банках і пералічыць грошы «куды трэба».

Жанчына паверыла і паспела аформіць некалькі пазыкаў. Потым яна прыйшла ў аддзяленне «Банка Дабрабыт», каб узяць яшчэ адзін крэдыт — на 26 тысяч рублёў.

Менавіта тут схему ўдалося перарваць. Супрацоўніца банка звярнула ўвагу на дзіўны стан наведвальніцы.

— Людзей, якія знаходзяцца пад уздзеяннем махляроў, адразу відаць. Мне хутка становіцца зразумела, калі чалавек прыйшоў і відавочна бярэ грошы не для сябе, пры гэтым быццам глядзіць кудысьці ўдалячынь і наогул не разумее, навошта гэта трэба, — расказала потым спецыялістка.

Супрацоўніца банка пагаварыла з жанчынай і патлумачыла: калі яна возьме грошы і перадасць іх трэцім асобам, то застанецца ні з чым і ў даўгах. Кліентку ўдалося ўразуміць. У выніку перадачу 26 тысяч рублёў прадухілілі, а раней аформленыя крэдыты ўдалося закрыць.

За пільнасць міліцыя абвясціла супрацоўніцы банка падзяку і ўручыла грашовую прэмію.