СМІ: Трамп паабяцаў Нэтаньягу падтрымку ўдараў па Іране

• 15.02.2026, 21:55

У выпадку правалу перамоваў з Тэгеранам.

Прэзідэнт ЗША Дональд Трамп сказаў прэм'ер-міністру Ізраіля Біньяміну Нэтаньягу, што падтрымае ізраільскія ўдары па ракетнай праграме Ірана, калі Вашынгтон і Тэгеран не дасягнуць пагаднення.

Пра гэта паведамляе CBS News са спасылкай на крыніцы.

Гэтая размова адбылася падчас сустрэчы Трампа і Нэтаньягу ў рэзідэнцыі прэзідэнта ЗША Мар-а-Лага ў снежні.

Паводле звестак крыніц у амерыканскіх вайсковых і разведвальных колах, ЗША засяроджваліся не столькі на тым, ці можа Ізраіль дзейнічаць, колькі на тым, як Вашынгтон мог бы дапамагчы з ударамі па Іране.

Сярод варыянтаў — забеспячэнне дазапраўкі ізраільскіх самалётаў у паветры і далікатнае пытанне атрымання дазволу на пралёт ад краін, што знаходзяцца ўздоўж патэнцыйнага маршруту.

Невядома, якія краіны дадуць дазвол на пралёт ЗША для дазапраўкі ізраільскіх самалётаў для патэнцыйнага ўдару. Іарданія, Саудаўская Аравія і Аб'яднаныя Арабскія Эміраты публічна заявілі, што не дазволяць выкарыстоўваць сваю паветраную прастору для любых удараў па Іране ці іранскіх удараў.

Гэтыя абмеркаванні ўнутры апарату нацыянальнай бяспекі супалі з дэманстрацыяй сілы з боку Злучаных Штатаў у дачыненні да Тэгерана.

У чацвер стала вядома, што другі амерыканскі авіяносец, USS Gerald R. Ford, і яго флатылія вайсковых караблёў будуць накіраваныя на Блізкі Усход.

Прэм'ер-міністр Ізраіля Нэтаньягу застаецца адкрыта скептычна настроеным адносна дыпламатыі з Іранам. Ён настойвае на тым, што любое пагадненне з Іранам павінна ўключаць абмежаванні на балістычныя ракеты.