У лесе пад Мінскам заблукала жанчына з паўтарагадовым дзіцем

• 15.02.2026, 22:45

Іх знайшлі выратавальнікі.

У Мінскім раёне ўвечары ў нядзелю, 15 лютага, жанчына заблукала ў лесе з паўтарагадовым дзіцем. Ім дапамаглі выратавальнікі, паведамляе МНС.

Інцыдэнт адбыўся ў лясным масіве паблізу аграгарадка Хатэжына. Дыспетчары МНС атрымалі паведамленне пра яго ад міліцыі.

Далей з жанчынай падтрымлівалі сувязь па мабільным тэлефоне. Яна, як гаворыцца ў паведамленні прэс-службы, «прадыктавала свае каардынаты», і дзякуючы гэтаму іх месцазнаходжанне хутка вызначылі.

Выратавальнікі накіраваліся ў пазначаную мясцовасць прачэсваць лес пешымі групамі і неўзабаве знайшлі тых, хто заблукаў. Іх вывелі да дарогі і перадалі брыгадзе хуткай дапамогі.

Чаму жанчына з малым апынуліся ў лесе адны ў мароз і ў цёмны час сутак, не ўдакладняецца.