Расійскія кампаніі рэзка скарацілі колькасць адкрытых вакансій

• 16.02.2026, 11:17

На тле пагаршэння сітуацыі ў эканоміцы.

У расійскіх кампаній на тле пагаршэння сітуацыі ў эканоміцы рэзка знізілася патрэба ў работніках. У снежні працадаўцы паведамілі ў дзяржаўныя службы занятасці пра 1,469 млн адкрытых вакансій, што на 13% менш, чым год таму, і на 9% менш, чым у лістападзе. Пры гэтым узровень беспрацоўя вырас з 2,1% у лістападзе да 2,2% у снежні. Пра гэта сведчыць зборнік Росстата «Сацыяльна-эканамічнае становішча Расіі» за 2025 год, з якім азнаёміўся «Коммерсант».

Максімальнае падзенне попыту на працоўную сілу ў снежні было зафіксавана ў Прыволжскім федэральным акрузе: паказчык упаў на 23% у параўнанні з мінулым годам — да 261 тыс. вакансій. Найменш скараціўся попыт на работнікаў у Цэнтральным федэральным акрузе: на 8% — да 387 тыс. У той жа час колькасць вакансій у Паўночна-Заходнім акрузе прадэманстравала рост на 8% — да 205 тыс. Згодна з афіцыйнай статыстыкай, максімуму паказчык патрэбы арганізацый у работніках дасягнуў да сярэдзіны 2024 года — тады ў чэрвені было адкрыта 2,124 млн вакансій. Пасля гэтага ён устойліва зніжаецца з невялікімі сезоннымі ўсплёскамі.

Рэкрутынгавыя сэрвісы таксама фіксуюць скарачэнне колькасці вакансій у краіне. Паводле даных SuperJob, у 2025 годзе іх стала на 12% менш, чым годам раней, а колькасць рэзюмэ, наадварот, вырасла на 19%. «У 2026 годзе тым, хто шукае працу, давядзецца прыкладаць больш высілкаў, чым раней, каб яе знайсці», — адзначыў прадстаўнік сэрвісу.

Пры гэтым ніжняя кропка падзення попыту на працу яшчэ не пройдзеная, лічыць эксперт Цэнтра макраэканамічнага аналізу і прагназавання Ігар Палякоў. «Росстат фіксуе значны прырост занятых па грамадзянска-прававых дагаворах — з некалькіх сотняў тысяч да 2 млн. Магчыма, кампаніі пераводзяць на такія дагаворы тых, каго плануюць скараціць у найбліжэйшы час», — патлумачыў эксперт.

У лагістыцы, будаўніцтве і прамысловым сектары ўжо ідзе скарачэнне супрацоўнікаў, кажа дырэктар па развіцці кампаніі HRlink Дзмітрый Махлін. Па яго словах, працадаўцы стараюцца пазбавіцца ад «супрацоўнікаў-пасажыраў» і пакінуць тых, чыя праца зразумелым чынам уплывае на вынікі бізнесу.

«Самаадчуванне» расійскіх кампаній рэзка пагоршылася на тле падзення тэмпаў росту эканомікі, высокай ключавой стаўкі, зніжанага попыту і санкцый. У студзені—лістападзе 2025 года 18,2 тыс. арганізацый паведамілі пра страты на агульную суму 7,5 трлн руб. Гэта стала рэкордам за ўвесь час назіранняў, пісалі «Известия» са спасылкай на даныя Росстата.

У той жа час апытанне сэрвісу «Актион Финансы» паказала, што бізнес не чакае паляпшэння стану эканомікі ў 2026 годзе і рыхтуецца скарачаць выдаткі, у тым ліку за кошт урэзання заробкаў і звальненняў.