Беларуску Марыю Жодык прызналі лепшай атлеткай года ў Падляскім ваяводстве Польшчы

• 16.02.2026, 12:29

Сярэбраная прызёрка чэмпіянату свету атрымала прэстыжную рэгіянальную ўзнагароду.

Ураджэнка Беларусі, скокунка ў вышыню Марыя Жодык стала лепшай атлеткай Падляскага ваяводства Польшчы паводле версіі Алімпійскага савета Падляшша. Яна выступае за клуб KS Podlasie Białystok, паведамляе Radio Białystok.

На камандным чэмпіянаце Еўропы ў 2025 годзе Марыя заняла другое месца з вынікам 1,97 метра. Галоўным жа дасягненнем стаў сярэбраны медаль на чэмпіянаце свету ў Токіа: у фінале яна з трэцяй спробы ўзяла вышыню 2,00 метра, усталяваўшы новы асабісты рэкорд.

Нагадаем, Марыя Жодык жыве ў Польшчы з 2022 года. Улетку 2024 года яна атрымала права афіцыйна прадстаўляць гэтую краіну на міжнародных спаборніцтвах.

Раней, выступаючы за Беларусь, спартсменка выканала нарматыў для ўдзелу ў Алімпіядзе ў Токіа (тады яе асабісты рэкорд складаў 196 см), аднак не змагла паехаць на Гульні праз халатнасць беларускіх чыноўнікаў, якія не забяспечылі своечасовае праходжанне допінг-тэстаў.

Марыя Жодык падпісала ліст за сумленныя выбары ў 2020 годзе і выступала супраць вайны ва Украіне.

У кастрычніку 2025 года яна таксама была прызнана ў Польшчы лепшай лёгкаатлеткай года на цэрэманіі «Лаўры Каралевы спорту».