У беларускі банк прынеслі незвычайную фальшывую купюру

• 16.02.2026, 15:17

Яна здзівіла нават экспертаў.

У Гродне малады чалавек прынёс у банк 100 юаняў — хацеў абмяняць грошы, але супрацоўніца банка заўважыла, што купюра насамрэч падазроная. Высветлілася, што гэта сапраўды так, прычым такі комплекс спосабаў падробкі элементаў абароны ў Беларусі сустракаецца ўпершыню.

У Дзяржаўным камітэце судовых экспертыз расказваюць, што касірка выклікала міліцыю, а тыя забралі купюру на экспертызу.

Судовы эксперт устанавіў: гэтая сотня юаняў узору 2015 года выраблена не прадпрыемствам, якое выпускае прадукцыю гэтага віду. Усе выявы выкананыя спосабам струменевага друку, а элементы абароны імітаваныя рознымі спосабамі. У Дзяржаўным камітэце судовых экспертыз адзначаюць, што менавіта комплекс спосабаў падробкі элементаў абароны для Беларусі новы.

Па гэтым факце праводзіцца праверка.