Украіна выкарыстоўвае памылкі Пуціна і дасягае поспехаў на фронце

• 16.02.2026, 17:51

ЗСУ дэманструюць нечаканы прагрэс.

Ваенныя эксперты адзначаюць, што ўкраінскія контратакі адбываюцца па ўсёй лініі фронту, а ў Дняпрапятроўскай і Запарожскай абласцях украінскія сілы вызваляюць вёскі і намерваюцца вярнуць значныя тэрыторыі, піша The Bulwark (пераклад — сайт Charter97.org).

Ключавым фактарам поспехаў сталі памылкі Расіі ў камунікацыях. Расійскія войскі шырока выкарыстоўвалі незаконна падключаныя тэрміналы Starlink, што прывяло да ўмяшання SpaceX і адключэння пірацкіх прыладаў. Адначасова расійскія ўлады пачалі абмяжоўваць працу мэсэнджараў Telegram і WhatsApp, прымушаючы салдат карыстацца непапулярным дзяржаўным сэрвісам Max. Гэтыя меры выклікалі хаос на фронце і дазволілі Украіне выкарыстаць пралікі праціўніка, у тым ліку з дапамогай кібераперацый, змушаючы расійскіх салдат раскрываць пазіцыі і збіраць сродкі на ўкраінскія дроны.

Акрамя таго, Украіна паспяхова выкарыстоўвае ўласную зброю: дальнабойныя ракеты «Фламінга» ўдарылі па складзе боепрыпасаў пад Валгаградам і па заводзе ў Тамбоўскай вобласці, які вырабляе абсталяванне для авіяцыі і ракетных сістэм. Спробы Расіі падарваць энергетычную інфраструктуру Украіны і дэмаралізаваць насельніцтва таксама не ўвянчаліся поспехам.

Нягледзячы на поспехі, Украіна ўсё яшчэ залежыць ад вайсковай дапамогі саюзнікаў. На Мюнхенскай канферэнцыі прэзідэнт Украіны Уладзімір Зяленскі падкрэсліў неабходнасць паставак сучаснай тэхнікі, уключаючы ракеты «Тамагавк» і сістэмы СПА «Patriot». Еўрапейскія партнёры ўзгоднілі пакет дапамогі на $38 млрд на 2026 год.

Эксперты адзначаюць, што расійская эканоміка зноў перажывае цяжкасці, а здольнасцям Крамля працягваць вайну ёсць межы. Гэта стварае асцярожны аптымізм, што 2026 год можа стаць пераломным для Украіны, калі саюзнікі працягнуць падтрымліваць яе намаганні на фронце.