The Atlantic: Рубіа крытыкуе саюзнікаў, ігнаруючы факты

• 16.02.2026, 17:04

Еўропа пачала ўмацоўваць абарону і падтрымліваць Украіну задоўга да пагрозаў Трампа.

Дзяржсакратар ЗША Марка Рубіа выступіў на Мюнхенскай канферэнцыі па бяспецы ў больш мяккім тоне ў дачыненні да еўрапейскіх саюзнікаў, чым віцэ-прэзідэнт ЗША Джэй Дзі Вэнс годам раней. Ягоны выступ аўдыторыя сустрэла з палёгкай, аднак еўрапейскія назіральнікі заўважылі галоўнае — Рубіа казаў пра Еўропу, але амаль не казаў пра ключавыя пагрозы — Расію, Кітай і Паўночную Карэю, піша The Atlantic (пераклад — сайт Charter97.org).

Рубіа падкрэсліў культурнае адзінства па абодва бакі Атлантыкі і заявіў, што ЗША «не збіраюцца быць ветлівымі наглядчыкамі кіраванага заняпаду Захаду». Ён прадставіў жорсткі падыход прэзідэнта ЗША Дональда Трампа як спробу «адраджэння і аднаўлення». Пры гэтым ён папракнуў Еўропу ў празмернай веры ў адкрытыя межы і міжнародныя інстытуты.

Аднак факты выглядаюць інакш. За апошняе дзесяцігоддзе еўрапейскія краіны рэзка павялічылі выдаткі на абарону: краіны НАТА без ЗША павялічылі іх спачатку на 70 млрд долараў падчас першага тэрміну Трампа, затым амаль на 190 млрд пры Байдэне. Еўропа таксама стала найбуйнейшым донарам Украіны — звыш 132 млрд еўра супраць 114 млрд долараў ад ЗША.

Паралельна ЕС узмацніў міграцыйную палітыку і распачаў эканамічную стратэгію «зніжэння рызык» адносна Кітая.

Найбольш трывожнае ў выступленні Рубіа — замоўчванне пра нарастальнае супрацоўніцтва Расіі, Кітая і Паўночнай Карэі. Масква, Пекін і Пхеньян умацоўваюць вайсковае партнёрства, а Кітай і КНДР фактычна ўдзельнічаюць у вайне ў Еўропе. Гэта — найбуйнейшы выклік для ЗША, Еўропы і Інда-Ціхаакіянскага рэгіёну.

Тым не менш Рубіа амаль не казаў пра гэта, засяродзіўшыся на крытыцы саюзнікаў. На думку аналітыкаў, такі падыход адлюстроўвае памылковы дыягназ і небяспечна наіўную стратэгію Вашынгтона ва ўмовах імкліва зменлівага сусветнага парадку.