Ва Украіне з'явіліся лётчыкі з ЗША і Нідэрландаў

• 17.02.2026, 12:50

З іх сфармавана ключавое падраздзяленне.

Ва Украіне створана эскадрылля F-16, у якую ўвайшлі ўкраінскія, амерыканскія і нідэрландскія лётчыкі. Яны дапамагаюць абараняць неба ад расійскіх ракет і дронаў.

Пра гэта піша французскае выданне, якое спецыялізуецца на працы з разведзвесткамі, Intelligence Online. Паводле звестак журналістаў, эскадрыллю сфармавалі ў апошнія тыдні ў строгай сакрэтнасці для кіравання новымі F-16. Падраздзяленне адыгрывае ключавую ролю ў абароне неба над Кіеўскай вобласцю, якая пастаянна падвяргаецца ўдарам расіян.

У склад увайшлі амерыканскія лётчыкі з велізарным баявым досведам у Афганістане. Адзін з іх нядаўна ўдзельнічаў у аперацыях на Блізкім Усходзе, пасля чаго далучыўся да абароны Украіны.

З боку Нідэрландаў прыцягнутыя лётчыкі, навучаныя ў элітных еўрапейскіх школах паветранага бою, якія спецыялізуюцца на сучасных тактыках перахопу і высокатэхналагічнай вайне ў паветры.

Intelligence Online удакладняе: заходнія ветэраны падпісалі часовыя кантракты з ратацыямі на 6 месяцаў (з магчымым падаўжэннем). Яны не маюць афіцыйных званняў ва украінскай структуры.

Эскадрылля штодня перахоплівае расійскія крылатыя ракеты «Калібр» і Х-101, а таксама дроны «Герань-5». F-16 выкарыстоўваюцца для патрулявання, у тым ліку ўначы, дзеля максімальнага радыёлакацыйнага пакрыцця і хуткага рэагавання.

Галоўная каштоўнасць заходніх лётчыкаў — досвед працы з высокатэхналагічным абсталяваннем, такім як прыцэльна-разведвальныя кантэйнеры Snipe. Сістэма дазваляе бачыць мэты на велізарных адлегласцях, суправаджаць ракеты і дроны ў цемры або ў аблоках. Украінскія лётчыкі асвойваюць гэта, але ветэраны паскараюць працэс.