ISW: Гэта найбольш паспяховая кантраатака Узброеных Сіл Украіны за 2,5 года

• 17.02.2026, 12:08

Украіна за пяць дзён вярнула 201 кв. км тэрыторыі.

Сілы абароны Украіны за 11–15 лютага вярнулі 201 квадратны кіламетр тэрыторыі, што стала самым хуткім тэмпам прасоўвання за апошнія 2,5 года.

Пра гэта паведамляе AFP, аналізуючы даныя Institute for the Study of War (ISW).

Як адзначаецца, эксперты ISW звязваюць актывізацыю ўкраінскіх кантраатак з нядаўнім абмежаваннем доступу расійскіх акупацыйных сіл да Starlink, што, паводле ацэнак аналітыкаў, прывяло да праблем са сувяззю і кіраваннем на полі бою.

У матэрыяле таксама зазначана, што 2 лютага ўкраінскі ўрад прыняў рашэнне аб стварэнні «белага спісу» тэрміналаў Starlink з абавязковай рэгістрацыяй і аўтарызацыяй прылад, каб прадухіліць выкарыстанне сістэмы расійскімі войскамі.

Раней паведамлялася, што войскі Расіі рухаюцца павольнымі тэмпамі на фронце ва Украіне, перабольшваючы свае «дасягненні», і крах украінскай абароны не прагназуецца.

Штотыднёвыя поспехі Расіі ў перыяд з канца лістапада 2025 года да сярэдзіны лютага 2026 года значна вагаліся. Па ацэнках ISW, на піку свайго прасоўвання расійскія войскі захапілі 141 квадратны кіламетр за тыдзень — з 25 па 31 студзеня, але затым прасоўванне акупантаў скарацілася да 74 квадратных кіламетраў за мінулы тыдзень (з 8 па 14 лютага).