Z-прапагандыст: Расія рухне па прыкладзе СССР

• 17.02.2026, 9:18

Рэсурсаў на працяг агрэсіі ў РФ ужо не засталося.

РФ не ў стане здабыць перамогу ў так званай «СВА». Аднак дзеля таго, каб выйсці з гэтай правальнай вайны, захаваўшы твар, Крэмль рыхтуе «апошнюю эскалацыю». І яна будзе вельмі небяспечнай для Расіі.

Пра гэта ў сваім блогу напісаў вядомы расійскі Z-патрыёт Максім Калашнікаў. Ён запэўніў, што рэсурсаў на працяг агрэсіі ў Расіі ўжо не засталося. І перад Крамлём стаіць задача зрабіць так, каб вынікі вайны можна было прадставіць насельніцтву як перамогу, заўважыў «Дыялог».

«Небяспечным момантам стане спроба апошняй эскалацыі. Чаму апошняй? А на наступныя ў РФ проста рэсурсаў няма, бо вайну трэба завяршыць так, каб было што паказаць як перамогу. А паколькі пра ўзяцце хоць Кіева, хоць Адэсы цяпер і гаворкі быць не можа, дык застаецца адзін варыянт: астатак Данецкай вобласці», — напісаў Калашнікаў.

Ён быў вымушаны прызнаць, што нават на захоп усёй Данецкай вобласці ў РФ няма сродкаў і сіл. Каб паспрабаваць яе адваяваць, давядзецца ісці на вельмі небяспечныя крокі: новую мабілізацыю як мінімум 500 тыс. чалавек і канфіскацыю банкаўскіх укладаў у насельніцтва.

Ён не выключыў, што «апошняй эскалацыяй» можа стаць і ўварванне РФ у НАТА, а менавіта ў краіны Балтыі. Аднак і тут спатрэбяцца мабілізацыя і адабранне грошай у насельніцтва.

«Але гэта выкліча і крайняе абурэнне грамадства, і рэзкі эканамічны спад, і абвастрэнне міграцыйнай праблемы», — напісаў Калашнікаў.

Ён канстатаваў, што «апошняя эскалацыя» ў выпадку няўдачы можа прывесці РФ да краху па сцэнары, паводле якога рухнуў Савецкі Саюз.