Жыхароў Хойнікаў да будаўніцтва ядзернага магільніка рыхтуюць ціхцем

• 17.02.2026, 12:25

Што пра гэта вядома?

У Хойніцкім раёне ўлады праводзяць «сустрэчы» з насельніцтвам з нагоды магчымага будаўніцтва магільніка радыеактыўных адходаў БелАЭС у вёсцы Новасёлкі.

11 лютага, як піша выданне «Флагшток», такая сустрэча адбылася ў ААТ «Хойніцкі завод гідраапаратуры».

Наступная запланаваная на 19 лютага ў Паселіцкім сельвыканкаме. Такія ж мерапрыемствы плануюцца ў Астравецкім раёне Гродзенскай вобласці і ў Мсціслаўскім раёне Магілёўскай вобласці.

Пры гэтым няма ніякіх публічных анансоў пра такія сустрэчы. На раённых дзяржаўных рэсурсах няма звестак, таму зацікаўленыя людзі не могуць узяць удзел у абмеркаванні. Няма ніякай інфармацыі на гэтую тэму і на сайце беларускай арганізацыі па абыходжанні з радыеактыўнымі адходамі (БелРАО).

Газета Хойніцкага райвыканкама распавяла пра першае такое абмеркаванне. Але пасля гэтага падаваць інфармацыю перастала. У тэлеграм-канале БелРАО гаворыцца, што «дыялог атрымаўся максімальна прадметным», а «пытанні былі ў лоб»:

Дзе насельніцтва гатова прыняць праект?

Чаму РФ не забірае нашы РАО?

Дзе браць дэфіцытных спецыялістаў?

Што з маніторынгам старых ПЗОД (сродкі прафесійнай абароны органаў дыхання)?

Ці стане медыцына ў рэгіёне лепшай?

Але адказы ў публікацыі не прыводзяцца. СМІ даведаліся, што на сустрэчы былі напружаныя дэбаты.