Apple запускае канкурэнта YouTube і Spotify

• 17.02.2026, 14:30

Кампанія Apple рыхтуе істотнае абнаўленне сэрвісу Podcasts.

Вядома, што праз фірмовае прыкладанне можна будзе глядзець і загружаць відэа, паведамляе CNBC.

Паводле дадзеных экспертаў, абнаўленне Apple Podcasts па функцыянальнасці набліжае сэрвіс да канкурэнтаў Spotify, YouTube і Netflix.

«Дваццаць гадоў таму Apple дадала падкасты ў iTunes, а больш за дзесяць гадоў таму мы прадставілі спецыяльнае прыкладанне Podcasts», — заявіў старшы віцэ-прэзідэнт Apple па пытаннях сэрвісаў Эдзі К’ю.

Паводле яго слоў, у абноўленым прыкладанні Apple Podcasts карыстальнікі змогуць пераключацца паміж праглядам і праслухоўваннем эпізодаў з адной стужкі. Яны таксама змогуць карыстацца рэжымам «карцінка ў карцінцы» і загружаць відэаэпізоды для прагляду афлайн.

Новы фармат таксама ўводзіць дынамічную ўстаўку відэарэкламы. Пры гэтым у Apple заявілі, што не будуць спаганяць плату з аўтараў кантэнту або правайдараў за распаўсюджванне відэападкастаў.