Стала вядома пра яшчэ адно падлеткавае самагубства

• 17.02.2026, 18:42

Яно адбылося ў Брэсце.

У Брэсце скончыў жыццё самагубствам дзясяцікласнік. Інфармацыя пра гэта з'явілася ў Threads удзень 17 лютага, як заўважыла «Зеркало».

«Брэст, што ў школе здарылася, хто ведае? Да мяне дайшлі толькі абрыўкавыя звесткі. У каго ёсць падрабязнасці?» — напісаў адзін з карыстальнікаў. У каментарыях расказалі, што вучань скочыў з даху 20-павярхоўкі. Калі менавіта гэта здарылася, невядома.

Каментатары паведамілі, што падлетак вучыўся ў 10-м класе 35-й школы. Верагодная прычына самагубства — цькаванне ў школе. Маўляў, перад тым як скочыць з даху шматпавярхоўкі, хлопец пакінуў запіску з імёнамі крыўднікаў.

У школе № 5, куды журналістка патэлефанавала як занепакоеная маці вучаніцы, адмовіліся што-небудзь казаць. Тым не менш інфармацыю ўскосна пацвердзілі.

— Вядзецца следства, таму ніякіх каментароў не будзе, — адказалі ў прыёмнай дырэктара.

У ўпраўленні адукацыі Маскоўскага раёна Брэста, куды журналістка патэлефанавала следам, спецыялістка аддзела агульнай, сярэдняй і дашкольнай адукацыі Алена Ліпская заклікала найперш супакоіцца.

— Найбольшая праблема — гэта паніка. Таму трэба прыйсці ў сябе і далей нармальна займацца выхаваннем дзяцей, — адзначыла чыноўніца. — Праводзіцца па дадзеных фактах праверка. І ўпраўленнем адукацыі, і Следчым камітэтам, і Мінадукацыі. Праверка праводзіцца ўсімі структурамі, разумееце. <…> Я думаю, што там будзе дадзена сур'ёзная ацэнка ўсяму, усім абставінам. А пакуль [нешта] заўчасна казаць.

Заўважым, гэта ўжо другі выпадак, пра які стала вядома ў аўторак, 17 лютага. У мінулыя выхадныя самагубства здзейсніў адзінаццацікласнік мінскай школы.

Заўважым, што афіцыйнай інфармацыі наконт гэтых рэзанансных здарэнняў дагэтуль няма, што толькі ўзмацняе распаўсюджванне чутак.