Axios: Пасланцы Трампа распавялі пра сапраўдныя намеры Крамля

• 18.02.2026, 9:32

Украіна не пагодзіцца на сцэнар РФ па Данбасе.

Прэзідэнт Украіны Уладзімір Зяленскі заявіў, што прадстаўнікі ЗША Стыў Уіткоф і Джарэд Кушнер падчас перамоваў данеслі да яго пазіцыю пра тое, што Расія нібыта сапраўды зацікаўленая ў завяршэнні вайны.

Пра гэта ён распавёў у інтэрв’ю Axios.

Паводле слоў Зяленскага, спецпасланцы Дональда Трампа раілі яму арганізоўваць працу перамоўнай каманды, зыходзячы з прадпушчэння, што Масква гатовая да завяршэння канфлікту.

Пры гэтым кіраўнік Украіны падкрэсліў: Украіна не пагодзіцца на сцэнар, паводле якога ёй давядзецца перадаць Расіі астатнюю частку Данбаса.

Зяленскі адкрыта заявіў, што нават калі такое пытанне вынесці на рэферэндум, большасць грамадзян яго ўсё адно не падтрымае. Ён даў зразумець, што не мае намеру прасоўваць пагадненні, якія грамадства лічыць несправядлівымі.

Зяленскі таксама раскрытыкаваў пазіцыю Дональда Трампа, адзначыўшы, што лічыць няправільным ціск з патрабаваннем саступак менавіта на Украіну, а не на РФ.

На яго думку, баланс адказнасці ў пытанні міру павінен быць прынамсі роўным.

Пры ўсім гэтым прэзідэнт Украіны дапусціў варыянт вынясення на рэферэндум ідэі замарозкі лініі фронту па бягучых пазіцыях бакоў. Ён лічыць, што пры фіксацыі фактычнай лініі судакранання украінцы могуць падтрымаць такі падыход.

Зяленскі дадаў, што гатовы абмяркоўваць адвод украінскіх войскаў з асобных участкаў Данбаса, але толькі пры ўмове сіметрычнага адводу расійскіх сіл. У той жа час спосабам дасягнуць рэальных вынікаў у тэрытарыяльнай спрэчцы ён бачыць асабістую сустрэчу з Уладзімірам Пуціным.

Зяленскі адзначыў, што даручыў сваёй дэлегацыі падняць пытанне аб перамовах на ўзроўні лідараў. Таксама прэзідэнт не выключыў свайго ўдзелу ў будучых выбарах, падкрэсліўшы, што канчатковае рашэнне будзе залежаць ад пазіцыі ўкраінскага грамадства.