Перамовы ў Жэневе: Зяленскі паведаміў пра прагрэс па адным з напрамкаў

• 18.02.2026, 14:25

Бакі амаль дамовіліся.

Падчас двухдзённых перамоваў у Жэневе дэлегацыі Украіны, Расіі і ЗША дасягнулі істотнага прагрэсу па ваенным напрамку, аднак абмеркаванне палітычных пытанняў было складаным.

Як паведамляе РБК-Украіна, пра гэта прэзідэнт Украіны Уладзімір Зяленскі распавёў падчас зносін з журналістамі.

«Што да змястоўнасці перамоваў. Перш за ўсё, вы ведаеце, ёсць два напрамкі: ваенны і палітычны. Тут хачу сказаць, што ўсе тры бакі ў ваенным напрамку былі канструктыўныя. На мой погляд, у прынцыпе, вайскоўцы разумеюць, як ажыццяўляць маніторынг спынення агню і спынення вайны», — заявіў Зяленскі.

Паводле яго слоў, вайскоўцы, у прынцыпе, амаль пра ўсё дамовіліся. Маніторынг дакладна будзе з удзелам амерыканскага боку, і гэта канструктыўны сігнал.

«Усе астатнія дэталі — дзе, як ажыццяўляць маніторынг, тэхнічныя нюансы — усё гэта мне генерал (начальнік Генштаба ЗСУ Андрэй — рэд.) Гнатаў дакладзе ў больш шырокім фармаце пасля вяртання», — дадаў прэзідэнт Украіны.

Кіраўнік дзяржавы таксама адзначыў, што палітычны складнік — гэта ўсе адчувальныя пытанні: Усход, Запарожская АЭС і інш.

«Мы бачым, што ёсць напрацоўкі, а пакуль пазіцыі розныя, бо перамовы былі няпростыя. То бок, у ваенным напрамку я пачуў прагрэс. У палітычным напрамку — быў дыялог, дамовіліся ісці далей», — падсумаваў кіраўнік Украіны.

Зяленскі таксама падкрэсліў, што з-за таго, што перамоўная група не можа па тэлефоне данесці ўсе дэталі, пасля вяртання будзе больш разумення адносна вынікаў перамоваў.