У Вялікабрытаніі з аўкцыёну прадаюць аўтамабіль з фільма «Місія нявыканальная»

• 18.02.2026, 15:23

На гэтым Jeep Wrangler у кадры ездзіў Том Круз.

У Вялікабрытаніі на аўкцыён выставілі незвычайны Jeep Wrangler 2023 года выпуску. Пазадарожнік здымаўся ў культавым фільме «Місія нявыканальная».

За асаблівы Jeep Wrangler плануюць атрымаць да 50 000 фунтаў стэрлінгаў ($67 800). Пра кінагероя распавялі на сайце Iconic Auctioneers.

Jeep Wrangler Rubicon мае набор фірмовых аксэсуараў — узмоцненыя бамперы, дугі замест дзвярэй, лябедку і вялікія пазадарожныя шыны BF Goodrich. Акрамя таго, усталявалі спецыяльнае абсталяванне — трубчасты каркас, чатырохкропкавыя рамяні бяспекі, абаронены бензабак, сістэмы аўтаматычнага пажаратушэння і адключэння акумулятара.

У фільме «Місія нявыканальная: Фінальная расплата» 2025 года гэты Jeep Wrangler можна ўбачыць у знакамітай сцэне пагоні ў шахце. На здымках за яго руль сядалі як Том Круз, так і прафесійныя каскадзёры.