Залужны ўпершыню расказаў пра канфлікт з Зяленскім
- 18.02.2026, 15:30
Разнагалоссі тычыліся стратэгіі вядзення вайны.
Былы галоўнакамандуючы Узброеных сіл Украіны, пасол Украіны ў Вялікабрытаніі Валерый Залужны упершыню расказаў пра разнагалоссі з прэзідэнтам Украіны Уладзімірам Зяленскім. У інтэрв’ю агенцтву Associated Press ён заявіў, што канфлікт паміж імі ўзнік неўзабаве пасля пачатку ўварвання Расіі і тычыўся стратэгіі вядзення вайны.
Па словах Залужнага, адносіны дасягнулі крытычнай кропкі напрыканцы 2022 года, неўзабаве пасля нарады ў штабе прэзідэнта. Тады супрацоўнікі СБУ правялі вобшук у будынку, дзе знаходзіўся яго камандны цэнтр. Экс-галоўкам назваў гэтую падзею «актам запалохвання». Падчас вобшуку Залужны патэлефанаваў кіраўніку Офіса прэзідэнта і папярэдзіў пра гатоўнасць прыцягнуць вайскоўцаў для абароны каманднага цэнтра Узброеных сіл Украіны.
Што шукалі сілавікі, яму не паведамілі. Залужны тады звязаўся з кіраўніком СБУ Васілём Малюком, які заявіў, што не мае звестак пра аперацыю. Пазней Залужны даведаўся, што за два дні да рэйду спецслужба звярталася ў Кіеўскі суд па ордэр на вобшук па адрасе каманднага цэнтра. Згодна з судовымі матэрыяламі, ішла гаворка пра памяшканне, дзе да вайны знаходзіўся закрыты стрыптыз-клуб. Экс-галоўкам лічыць, што ордэр быў падставай, і спецслужбы не маглі пераблытаць месцазнаходжанне галоўнага вайсковага штаба краіны. У Офісе прэзідэнта каментаваць сітуацыю адмовіліся.
Спрэчкі таксама выклікала ўкраінскае контрнаступленне 2023 года. Залужны заявіў, што аперацыя правалілася таму, што Зяленскі і іншыя чыноўнікі «не выдзелілі неабходныя рэсурсы». Паводле яго слоў, план распрацоўваўся пры садзеянні партнёраў па НАТА і прадугледжваў канцэнтрацыю вялікіх сіл у «адзін кулак» для вызвалення часткі Запарожскай вобласці з АЭС і прасоўвання да Азоўскага мора. Гэта дазволіла б перарэзаць сухапутны калідор забеспячэння Крыму. Паводле яго, для поспеху патрабаваліся маштабная канцэнтрацыя сіл і тактычная нечаканасць. Аднак замест гэтага войскі былі расцярушаныя па шырокай лініі фронту, што знізіла ўдарную магутнасць. Контрнаступленне з цягам часу падвергнулася крытыцы з боку вайсковых экспертаў за празмерную амбіцыйнасць і позні пачатак, які дазволіў расійскім сілам умацаваць абарону.
Залужны таксама лічыць, што ключавая праблема ўкраінскай ваеннай стратэгіі палягае ў нерэалістычных чаканнях пры цяперашняй колькасці войскаў і несістэмным упроваджанні новых тэхналогій. Ён адзначыў, што пасля адстаўкі ў лютым 2024 года не ўдзельнічае ў прыняцці ваенных рашэнняў. Паводле яго слоў, пасля звальнення яны з Зяленскім сустракаліся двойчы, і абодва разы размовы былі «сяброўскімі».
Згодна з апытаннямі, Залужны застаецца адным з асноўных патэнцыйных супернікаў Зяленскага падчас магчымых прэзідэнцкіх выбараў. Паводле дадзеных Ipsos, Залужнага падтрымалі б 23% рэспандэнтаў супраць 20% у Зяленскага. Шмат украінцаў успрымаюць яго як постаць, здольную змяніць сістэму, адзначае палітычны аналітык Уладзімір Фесенка: «Людзі будуць галасаваць не толькі за Залужнага, але і супраць Зяленскага — ускладаючы на яго адказнасць за правалы яго прэзідэнцтва».