«Заснавальніка ДНР» абвінавацілі ў дыскрэдытацыі расійскай арміі

• 18.02.2026, 19:07

Данос на яго мог напісаць камандзір «Ахмата».

На былога «народнага губернатара ДНР», тэрарыста Паўла Губарава склалі пратакол аб дыскрэдытацыі расійскай арміі. Адміністрацыйная справа па частцы 1 артыкула 20.3.3 КоАП зарэгістравана ў Таганскім раённым судзе Масквы 18 лютага, як вынікае з картатэкі Масгарсуда.

Артыкул прадугледжвае штраф да 50 тысяч рублёў. Сам Губарэў у размове з РБК заявіў, што яму невядомыя прычыны складання пратаколу. «Ці з'яўляецца гэта чыімсьці ўмыслам, не ведаю, магу толькі меркаваць, што камусьці не спадабаліся мае тэксты. Факт ацэньваю як беспрасветную дурноту», — сказаў ён, адзначыўшы, што «ніякіх наступстваў» для сябе не чакае.

У сваім тэлеграм-канале Губарэў дапусціў, што данос на яго напісаў намеснік начальніка Галоўнага ваенна-палітычнага ўпраўлення Узброеных Сіл РФ, камандзір спецназа «Ахмат» Апці Алаудзінаў.

Павел Губарэў быў адным з лідараў прарасійскіх баевікоў на Данбасе вясной 2014 года. Тады ж яго абвясцілі «народным губернатарам ДНР». Пазней ён з'ехаў у Расію, а пасля пачатку поўнамаштабнага ўварвання ва Украіну, па ўласных словах, адправіўся на фронт. У 2023 годзе ён уступіў у «Клуб разгневаных патрыётаў», заснаваны былым «міністрам абароны ДНР» Ігарам Стралковым (Гіркіным). Чальцы клуба выступаюць у падтрымку вайны, але крытыкуюць расійскія ўлады за, на іх думку, недастаткова эфектыўнае вядзенне баявых дзеянняў.