«Вось такая параноя з боку Лукашэнкі»

• 18.02.2026, 20:50

Беларускія чыноўнікі таемна жадаюць паразы Расіі.

Галоўная рэдактарка сайта Charter97.org Наталля Радзіна, адказваючы на пытанне вядомага журналіста Яўгена Кіселёва аб настроях у беларускай наменклатуры, распавяла, што ўнутры рэжыму Лукашэнкі ідзе сабатаж:

— Думаю, што беларускія чыноўнікі таемна жадаюць паразы Расіі ў гэтай вайне. Вядома, асабіста Лукашэнка разумее, што параза РФ прывядзе да пазбаўлення падтрымкі ад Пуціна, а сам ён можа страціць уладу. Што да беларускай наменклатуры і бізнесу, я практычна на 100% упэўненая, што яны жадаюць перамогі Украіне, бо цудоўна ведаюць, што інакш ім давядзецца стаць яшчэ адным рэгіёнам РФ, а гэтага яны крайне не хочуць, бо адразу згубяць уладу.

Яны сабатуюць інтэграцыю з РФ, наколькі гэта магчыма. Аднак пакуль ідзе вайна, а Расія адносна моцная, беларускія чыноўнікі баяцца дзейнічаць больш актыўна, але пэўныя спробы перамоваў з Захадам, з ЗША, хай і з дазволу Пуціна, імі прадпрымаюцца.

Час відавочна на нашым баку. Пуцін і Лукашэнка скончацца фізічна, эканамічна і ў ваенным плане. Не бачу ў Расіі нават некалькіх гадоў. Калі слухаеш Віталя Портнікава, ён мяркуе, што Расія можа ваяваць да 2030 года і далей. Не думаю, што ў іх ёсць такі запас сілаў. Шмат што можа вырашыцца ў бліжэйшы год-два, калі будуць рашучыя дзеянні з боку Захаду. Тут я б не стала лічыць, што Трамп будзе працаваць выключна на Расію. Цяпер многія прадказваюць яго паразу на прамежкавых выбарах у Кангрэс. Шэраг экспертаў, якія скептычна ставяцца да прэзідэнта ЗША, лічаць, што напярэдадні выбараў Трамп можа больш рашуча дзейнічаць у дачыненні да Пуціна. Бо грамадская думка ў ЗША адназначна на баку Украіны.

У канцы Наталля Радзіна звярнула ўвагу на псіхічны стан Лукашэнкі. Дыктатар ужо некалькі тыдняў, абмінаючы Генштаб і Мінбароны, падымае па трывозе беларускія войскі:

— Увесь гэты кіпіш Лукашэнка ладзіць на розных палігонах краіны, бо вельмі напалохаўся спецаперацыі ЗША ў Венесуэле. Гэта адзіная версія, чаму ў беларускай арміі праходзяць раптоўныя праверкі. Лукашэнка баіцца, што яго могуць выкрасці ў рэзідэнцыі ў Драздах і даставіць у Гаагу, дзе яму давядзецца адказваць за ўсе злачынствы.

Дарэчы, выказваліся здагадкі, што Лукашэнка не паляцеў у Вашынгтон на «Савет міру» Трампа, бо таксама баяўся, што раптам яго там могуць арыштаваць. Даверу ў яго няма ні да еўрапейцаў, ні да амерыканцаў. Вось такая параноя з боку Лукашэнкі.