Трамп выводзіць войскі ЗША з Сірыі з-за эскалацыі з Іранам

• 19.02.2026, 10:27

На гэтым фоне Вашынгтон нарошчвае ваенную прысутнасць на Блізкім Усходзе.

ЗША плануюць у найбліжэйшыя месяцы вывесці рэшткі свайго ваеннага кантынгенту з Сірыі — Дамаск ужо не мае ў гэтым такой вострай патрэбы, як раней.

Пра гэта паведамляе BBC.

Паводле слоў высокапастаўленага прадстаўніка Белага дома, Дамаск пагадзіўся самастойна ўзяць на сябе барацьбу з тэрарызмам у межах краіны, таму амерыканская прысутнасць «ў такім маштабе» больш не з'яўляецца неабходнай.

Як вядома, амерыканскія вайскоўцы знаходзяцца ў Сірыі з 2015 года ў межах кампаніі супраць групоўкі «Ісламская дзяржава». Мова ідзе пра каля тысячы ваеннаслужачых, якія заставаліся на тэрыторыі краіны.

Рашэнне аб іх вывадзе, паводле чыноўніка, з'яўляецца часткай пераходнага працэсу і залежыць ад выканання пэўных умоў. У той жа час ЗША захоўваюць гатоўнасць аператыўна рэагаваць на магчымыя пагрозы ў рэгіёне.

Варта адзначыць, што на гэтым фоне Вашынгтон нарошчвае ваенную прысутнасць на Блізкім Усходзе з-за росту напружанасці з Іранам. СМІ пацвердзілі знаходжанне авіяносца USS Abraham Lincoln з ракетнымі эсмінцамі і дзесяткамі знішчальнікаў паблізу Ірана.

Таксама ЗША накіравалі ў рэгіён найбуйнейшы карабель ВМС — «Джэральд Р. Форд», які павінен прыбыць цягам трох тыдняў.

СМІ ўжо паведамілі пра тое, што армія ЗША рыхтуе ваенную аперацыю ў Іране у найбліжэйшы час.