Саудаўская Аравія зрушыла Расію з першага месца па пастаўках нафты ў Індыю

• 19.02.2026, 14:24

Такога не назіралася з восені 2022 года.

Частка расійскай нафты ў індыйскім імпарце ўпала ў студзені да мінімуму з кастрычніка 2022 года, калі Індыя толькі нарошчвала закупкі ў Расіі, з якой яна не супрацоўнічала ў гэтай сферы да пачатку вайны ва Украіне. Каб кампенсаваць скарачэнне паставак, Індыя значна павялічыла закупкі на Блізкім Усходзе, частка якога склала 55% супраць 21,2% у Расіі.

Такога не назіралася з восені 2022 года, калі гатунак Urals, ад якога Еўропа рыхтавалася адмовіцца, пачаў выціскаць блізкаўсходнія гатункі ў індыйскім імпарце. Даныя ж за люты «ужо паказваюць, што Саудаўская Аравія аднавіла сваю пазіцыю галоўнага пастаўшчыка Індыі, а імпарт дасягнуў новага рэкорднага ўзроўню», — сказаў Reuters Суміт Рытола, вядучы аналітык Kpler.

У студзені Індыя атрымлівала 1,1 млн барэляў расійскай нафты ў суткі, што на 23,5% менш, чым у снежні, і на траціну менш, чым годам раней. Падзенне, відаць, працягнецца, кажа Рытола: калі ў лютым імпарт складзе прыблізна 1-1,2 млн барэляў, то ў сакавіку чакаецца ўсяго 800 000 барэляў у суткі.

Паводле ацэнкі Kpler, у сярэднетэрміновай перспектыве расійскія пастаўкі будуць паступова скарачацца, але поўнасцю не спыняцца.

Іх, у прыватнасці, працягне атрымліваць Nayara Energy, якая кантралюецца «Раснафтай» і знаходзіцца пад санкцыямі Еўразвязу. Іншых крыніц у гэтай кампаніі з НПЗ магутнасцю 400 000 барэляў у суткі няма.

Частка імпарту з краін Лацінскай Амерыкі ў студзені дасягнула 12-месячнага максімуму на ўзроўні каля 10%.