СМІ: ЦРУ ведала пра план падрыву «Паўночнага патоку»
- 19.02.2026, 21:13
ЗША першапачаткова падтрымлівалі намеры ўкраінцаў.
Амерыканская разведка магла ведаць пра падрыхтоўку падрыву газаправодаў «Паўночнага патоку» яшчэ на раннім этапе планавання аперацыі. Пра гэта гаворыцца ў расследаванні нямецкага выдання Der Spiegel.
Паводле даных журналістаў, вясной 2022 года ў Кіеве адбыліся сустрэчы паміж прадстаўнікамі Цэнтральнага разведвальнага ўпраўлення (ЦРУ) і ўкраінскімі спецыялістамі па дыверсійных аперацыях. Менавіта тады, як сцвярджаюць крыніцы журналістаў, украінскі бок нібыта прадставіў ідэю падарваць газаправоды, па якіх Расія транспартавала газ у Германію, фінансуючы такім чынам вайну супраць Украіны. Паводле ўкраінскага боку, амерыканцам гэты план спадабаўся.
Выданне піша, што пасля гэтага адбыліся далейшыя сустрэчы паміж прадстаўнікамі ЦРУ і арганізатарамі атак на газаправоды. Der Spiegel пагаварыў з некалькімі людзьмі ва Украіне, якія расказалі падрабязнасці гэтых сустрэч.
Паводле крыніц, ідэя ўзнікла вясной 2022 года, у разгар поўнамаштабнага ўварвання, калі была неабходнасць нанесці Расіі балючы ўдар.
Адзін з крыніц расказаў, што ўжо на другой сустрэчы ад ЦРУ паступіў сігнал падтрымкі, і нават болей: у ўкраінскага боку склалася ўражанне, што амерыканскія агенты маглі б дапамагчы з фінансаваннем плана.
Аднак пазней пазіцыя ЗША змянілася. Паводле Spiegel, летам 2022 года ЦРУ заявіла, што не можа падтрымаць аперацыю, у прыватнасці фінансава. Прамых тлумачэнняў не было дадзена.
«Вясной 2022 года, паводле крыніц у амерыканскіх спецслужбах, інтарэсы Вашынгтона былі зусім іншымі. У той час асноўная ўвага была засяроджана на арганізацыі максімальна магчымай падтрымкі Украіны. Чаму ЗША павінны былі апраўдваць напад на інфраструктуру саюзніка?» — пішуць журналісты.
Акрамя таго, гаворыцца ў матэрыяле, у чэрвені 2022 года адбылася ўцечка інфармацыі: нідэрландская ваенная разведка MIVD праз крыніцу ва Украіне даведалася пра планы атакі і папярэдзіла ЦРУ і Федэральную выведвальную службу Германіі.
Немцы тады, летам 2022 года, нібыта паставіліся да гэтага скептычна.