Цэлую вёску выстаўлі на продаж у Віцебскай вобласці

• 20.02.2026, 13:44

Яна носіць каларытную назву «Вяселуха».

У Віцебскай вобласці на продаж выстаўлена цэлая вёска з каларытнай назвай «Вяселуха». Аб'ект размешчаны ўсяго ў 6 кіламетрах ад раённага цэнтра Паставы, паведамляе smartpress.by.

Вёска складаецца з трох дамоў і знаходзіцца ў прыватнай уласнасці. Агульная плошча зямельнага ўчастка — 2 гектары. На тэрыторыі ёсць уласны стаў. Цікавая прапанова для вялікай сям'і, для стварэння аграсядзібы, агратурыстычнага комплексу, фермы або загараднай рэзідэнцыі.

Месца адрозніваецца маляўнічым размяшчэннем: вакол лес, побач працякае рака. Пры гэтым вёска знаходзіцца не на праезнай дарозе, гаворыцца ў аб'яве.

З камунікацый маюцца калодзеж і электрычнасць. Таксама ўказана, што магчыма мадэрнізаваць падстанцыю і павялічыць магутнасць электразабеспячэння да 100 кВт на ўсю вёску.

Кошт аб'екта — 9990 долараў.

Падобныя прапановы надзвычай рэдка з'яўляюцца на рынку нерухомасці. Звычайна прадаюцца асобныя дамы або ўчасткі, аднак продаж адразу цэлай вёскі — па сутнасці, гатовай прасторы для ўласнага праекта — унікальны выпадак.