Ваеннаабавязаных у Беларусі могуць прызваць на зборы на два месяцы

• 20.02.2026, 15:30

Патрабуюць прыбыць менш чым за суткі.

У Узброеных Сілах праводзіцца другі этап праверкі ўзроўню баявой і мабілізацыйнай гатоўнасці асобных злучэнняў і вайсковых частак. З гэтай мэтай ваеннымі камісарыятамі ажыццяўляецца прызыў ваеннаабавязаных на ваенныя зборы па праверцы мабілізацыйнай гатоўнасці, расказаў намеснік начальніка ўпраўлення галоўнага арганізацыйна-мабілізацыйнага ўпраўлення Генеральнага штаба Узброеных Сіл палкоўнік Юрый Ганціеўскі.

«Гэты від збораў мае шэраг асаблівасцей. Тэрміны прыбыцця ваеннаабавязаных на папярэднія пункты збору з моманту атрымання павесткі мінімальныя і могуць складаць менш за суткі. Працягласць гэтага віду збораў можа складаць да 60 сутак.»

Юрый Ганціеўскі дадаў, што падставы, паводле якіх ваеннаабавязаныя могуць быць вызваленыя ад праходжання ваенных збораў, вызначаныя ў артыкуле 71 Закона Рэспублікі Беларусь «Аб ваенным абавязку і ваеннай службе», а таксама ў артыкуле 17 Закона Рэспублікі Беларусь «Аб мабілізацыйнай падрыхтоўцы і мабілізацыі».

У артыкуле 71 у асобных выпадках пры наяўнасці паважлівых прычын і пацвярджальных дакументаў ваенным камісарам раёнаў, гарадоў прадастаўляецца права вызваляць ваеннаабавязаных ад праходжання ваенных збораў і па іншых прычынах, расказаў прадстаўнік Генштаба.

Ён прывёў такі прыклад: непаўналетняе дзіця, катаючыся з горкі, зламала руку. Яго маці ў гэты час знаходзіцца ў камандзіроўцы. Бацька — ваеннаабавязаны — атрымлівае павестку для прыбыцця на ваенныя зборы. Падаўшы ўсе пацвярджаючыя дакументы, ваенным камісарам было прынята рашэнне вызваліць гэтага ваеннаабавязанага ад праходжання ваенных збораў.