Байцы СБУ ўстанавілі рэкорд далёкасці паражэння

• Аляксандр Чэрненка
• 20.02.2026, 17:34

Выбухі сталі яшчэ больш інтэнсіўнымі.

У сучаснай інфармацыйнай прасторы важна вылучаць ключавыя навіны. Рэперныя пункты. Вызначыўшы іх, значна лягчэй зразумець агульную карціну. Аднымі з такіх рэперных пунктаў цяперашняга этапу вайны сталі новыя атакі дронаў СБУ па аб’ектах у глыбокім тыле расіян. Цяпер «бавоўна» стала яшчэ больш інтэнсіўнай, а адлегласць, на якую б’юць дроны Службы бяспекі, усё павялічваецца.

Давайце зірнем на апошнія ўдары. Падрыў НПЗ у Ухце. Гэта, між іншым, Рэспубліка Комі, рэкорд па далёкасці паражэння за ўсю вайну — 1700 км! Наступны ўдар — хімзавод у Пермскім краі. 1600 км ад Украіны! Завод, які працаваў на расійскі ВПК і быў ключавым звяном у вытворчасці выбуховых рэчываў, знаходзіўся пад міжнароднымі санкцыямі. Але санкцыі ад СБУ зноў аказаліся больш дзейснымі. А ўзнагарода «найбуйнейшы пажар тыдня» гэтым разам паедзе ў Пскоўскую вобласць. Тут дроны службы паспяхова атакавалі буйную нафтабазу: чатыры магутныя выбухі — і ніякія антыдронавыя сеткі не дапамаглі.

З вайскова-тэхнічнага пункту гледжання гэтыя аперацыі сведчаць пра рост далёкасці і дакладнасці дронаў службы. Мова не толькі пра факт дасягнення мэты, але і пра здольнасць абыходзіць шматслаёвую сістэму СПА, якая прыкрывае стратэгічныя аб’екты ў глыбіні тэрыторыі праціўніка. Звярніце ўвагу і на разнавектарнасць выбару мэтаў. Усе гэтыя паражэнні не толькі ствараюць праблемы для ВПК, але і дэманструюць, што ні адзін расійскі рэгіён не можа адчуваць сябе цалкам абароненым.

Акрамя таго, такія ўдары з’яўляюцца часткай кампаніі па знясіленні эканамічнага патэнцыялу праціўніка. Украіна не можа сіметрычна адказваць на масіраваныя ракетныя абстрэлы, аднак здольная асіметрычна ўплываць на крытычную інфраструктуру Масковіі. Мэта — не толькі фізічнае знішчэнне аб’ектаў, але і пастаяннае прымушэнне Расіі траціць рэсурсы на абарону глыбокага тылу, павялічваючы бюджэтныя выдаткі на бяспеку. Усё гэта павялічвае кошт вайны для Крамля.

У цэлым атакі на хімзавод у Пермскім краі, НПЗ у Ухце і нафтабазу ў Пскоўскай вобласці дэманструюць працяг сістэмнага ціску на энергетычную і прамысловую інфраструктуру Расіі. Гэта стратэгія доўгатэрміновага знясілення, якая аб’ядноўвае вайсковы, эканамічны і псіхалагічны эфекты і фармуе новую якасць вайны, у тым ліку і на вялікай адлегласці.

Прыкметна, што на новы ўзровень інтэнсіўнасці удараў служба выйшла пад кіраўніцтвам Яўгена Хмары. Баявога генерала, які доўгі час якраз і ўзначальваў Цэнтр спецыяльных аперацый «А». Менавіта Хмара быў адным з тых, хто раней прыклаў руку да распрацоўкі многіх аперацый супраць расіян, а цяпер паспяхова маштабуе гэтую працу на новай пасадзе.

Аляксандр Чэрненка, censor.net