Вярхоўны суд ЗША адмяніў глабальныя мытныя пошліны Трампа

• 20.02.2026, 18:31

Фондавы рынак ЗША адрэагаваў на гэта рэзкім ростам.

Вярхоўны суд ЗША палічыў незаконнымі мытныя пошліны, уведзеныя прэзідэнтам ЗША Дональдам Трампам у красавіку, пра што сведчыць рашэнне, апублікаванае на сайце суда, перадае Bloomberg.

6 галасамі супраць трох суд пастанавіў, што Трамп перавысіў свае паўнамоцтвы, спаслаўшыся на федэральны закон аб надзвычайных паўнамоцтвах для ўвядзення «ўзаемных» мытных пошлін у дачыненні да гандлёвых партнёраў ва ўсім свеце, а таксама мэтавых імпартных пошлін, якія, паводле заяў адміністрацыі, мусілі супрацьдзейнічаць абароту фентанілу.

Суддзі не сталі разглядаць пытанне аб тым, у якой ступені імпарцёры, пацярпелыя ад павышаных ставак, маюць права на вяртанне сродкаў. Гэтае пытанне пакінута на меркаванне ніжэйстаячай інстанцыі. У выпадку поўнага адабрэння сума можа скласці да $170 млрд — больш за палову ўсіх даходаў, атрыманых ад пошлін Трампа, адзначае агенцтва.

Фондавы рынак ЗША адрэагаваў на гэта рэзкім ростам. Індэкс Dow Jones, які да таго зніжаўся, цяпер прыбаўляе каля 0,2%. Індэкс S&P падняўся на 0,4%, Nasdaq Composite ўзмацніў рост і падскочыў адразу на 0,6%.