Частку беларусаў пазбавілі магчымасці гуляць у імгненныя латарэі

• 20.02.2026, 20:33

З'явіўся ўзроставы цэнз.

Лукашэнка падпісаў указ аб узроставым цэнзе для электронных імгненных латарэй. Пра гэта паведамляе прэс-служба дыктатара.

Указ № 64 «Аб удасканаленні латарэйнай дзейнасці», які ўносіць праўкі ў прыняты раней Указ № 209 ад 2007 года, беларускі правіцель падпісаў у пятніцу, 20 лютага. Асноўная мэта навацый — абарона інтарэсаў непаўналетніх і прафілактыка гульнявой залежнасці ў сацыяльна ўразлівых слаёў насельніцтва.

Згодна з дакументам, у Беларусі ўводзіцца строгая забарона на ўдзел у электронных імгненных латарэях асоб, якія не дасягнулі 18 гадоў, і грамадзянаў, ужо абмежаваных у наведванні ігральных устаноў і ўдзеле ў азартных гульнях.

Указам таксама вызначаны механізм адмовы банкаў у правядзенні транзакцый па аплаце латарэйных ставак для беларусаў, якія падпадаюць пад абмежаванні. Акрамя таго, цяпер папаўненне гульнявога рахунку ў латарэях магчыма толькі ў безнаяўнай форме, што дазволіць гарантаваць, што гульцу споўнілася 18 гадоў.