Марскаму пяхотніку РФ у Кіеве прысудзілі пажыццёвае зняволенне

• 20.02.2026, 21:11

За расстрэл палонных.

Суд у Кіеве прысудзіў расійскага марскога пяхотніка Уладзіміра Іванова, прызнанага вінаватым у забойстве двух ваеннапалонных, да пажыццёвага пазбаўлення волі. На такім пакаранні настойваў бок абвінавачвання, паведаміў у сваім Telegram-канале ў пятніцу, 20 лютага, генеральны пракурор Украіны Руслан Краўчанка.

Суд устанавіў, што ў студзені 2025 года падчас баёў у Курскай вобласці Іваноў і іншыя расійскія вайскоўцы ўладкавалі засаду. Два ўкраінскія вайскоўцы склалі зброю і паднялі рукі, каб здацца ў палон, але Іваноў адкрыў па іх агонь. На пасяджэннях суда сведкі – саслужыўцы Іванова – заяўлялі, што ён дзейнічаў па загадзе камандзіра.

«Суд устанавіў: ніякай ваеннай неабходнасці ўжываць сілу не было, а асуджаны ўсведамляў злачынны характар загаду і мог адмовіцца яго выконваць», – напісаў Краўчанка.

Дзеянні Уладзіміра Іванова былі кваліфікаваныя паводле артыкула «парушэнне законаў і звычаяў вайны, учыненае групай асоб, што пацягнула смерць асобаў пад абаронай міжнароднага гуманітарнага права». Суд таксама часткова задаволіў грамадзянскі пазоў: Іваноў абавязаны заплаціць 50 млн грыўняў (амаль 982 тысячы еўра) кампенсацыі былой жонцы аднаго з загінулых, адзначае «Суспільне».

Сам падсудны заявіў, што каецца ў злачынстве.