Беларускі лёгкаатлет увайшоў у гісторыю

• 20.02.2026, 21:14

Яму пакарылася важная планка.

Першы дзень чэмпіянату Беларусі па лёгкай атлетыцы ў памяшканні прынёс сапраўдную сенсацыю.

У магілёўскім спарткомплексе «Алімпіец» праз 28 гадоў быў пабіты нацыянальны рэкорд у скачках з шастом.

Беларускі лёгкаатлет Мацвей Волкаў ва ўзросце 21 года пераадолеў вышыню 6,01 м.

Папярэдняе дасягненне было ўстаноўлена Дзмітрыем Маркавым 20 лютага 1998 года і складала 6 м. Як паведамляе прэс-служба Беларускай федэрацыі лёгкай атлетыкі, Мацвей Волкаў стаў усяго толькі 30-м спартсменам у свеце, які ўвайшоў у «клуб 6 м».

Вышэй за яго на ўсёй планеце скакалі толькі 16 чалавек у гісторыі, і ніхто — у гэтым сезоне. Прама цяпер Волкаў — лідар сусветнага рэйтынгу.