З'явіліся падрабязнасці разбойнага нападу на Міншчыне
- 21.02.2026, 5:33
Сям'ю беларусаў, на якую напалі трое замежнікаў, катавалі «дзеля ціску на іншага чалавека».
У ноч на 16 лютага ў вёсцы Будагово Мінскай вобласці каля чацвёртай гадзіны раніцы трое маладых людзей, узброеных бітай і двума траўматычнымі пісталетамі, уварваліся ў прыватны дом, разбіўшы акно. Іх ахвярамі сталі 63-гадовы гаспадар, яго 65-гадовая жонка і 67-гадовы брат, якім зламыснікі нанеслі шматлікія траўмы. Падрабязнасці інцыдэнту пацярпелыя расказалі тэлеканалу ОНТ, піша «Зеркало».
Гаспадар дома расказаў, што ў тую ноч яго разбудзіў лай сабакі ў двары. Мужчына паглядзеў у акно і ўбачыў «тры сілуэты бандыцкага выгляду ў масках».
— Да гэтага яны проста краліся. Калі яны мяне ўбачылі, то кінуліся, выбілі акно. Я, дзякуй Богу, успомніў пра [трывожную] кнопку, — расказаў мужчына.
Да прыезду сілавікоў зламыснікі выцягнулі трох жыхароў дома ў калідор, паставілі на калені, збівалі бейсбольнымі бітамі і траўматычнымі пісталетамі. Катаванні яны здымалі на відэа.
— Збівалі вельмі жорстка. Кожныя 15–20 секунд металічнымі бітамі білі вельмі моцна і вельмі балюча па ўсіх месцах. Два пісталеты… Увесь час пагражалі, што зараз пачнуць страляць і заб'юць. І рукаяткамі пісталетаў таксама білі па галаве. Я вельмі баяўся, — расказаў брат гаспадара дома.
Трэцяя пацярпелая расказала, што нападнікі «уключылі гучней тэлевізар, закрылі дзверы, каб менш было чутна».
— Было вельмі балюча. Вельмі страшна. Пашевяліцца ўвогуле было немагчыма, таму што яны ўвесь час кантралявалі і крычалі, пагражалі пісталетам, забойствам. Я ўжо да смерці прыгатавалася. Так ужо змірылася. Думаю: «Напэўна, нам хана», — падзялілася жанчына.
Прыбылыя на выклік супрацоўнікі Дэпартамента аховы акружалі дом. Адзін з сілавікоў пачаў стукаць у дзверы, каб «злачынцы разумелі, што звонку знаходзіцца міліцыя».
Зламыснікі выбеглі з дома і паспрабавалі ўцячы. Аператыўнікі затрымалі двух нападнікаў на месцы. Трэцяга яны дагналі ў лесе.
Усе фігуранты — замежнікі. Адзін з іх непаўналетні, яму 17 гадоў, двум іншым — па 18. Заказ на запалохванне сям'і з Будагово яны атрымалі праз Telegram. За выкананую працу ім паабяцалі 300 тысяч расійскіх рублёў (каля 3,9 тысячы долараў па курсе на 20 лютага 2026 года).
Пацярпелы гаспадар дома расказаў, што іх «заказалі дзеля ціску на іншага чалавека».
— Я не буду гаварыць якога, але гэта наш блізкі сваяк. Ён знаходзіцца за мяжой, — без падрабязнасцяў паведаміў мужчына.
На дадзены момант жыццям пацярпелых нічога не пагражае. У дачыненні да затрыманых замежнікаў узбудзілі крымінальную справу па ч. 1 арт. 14, ч. 2 арт. 147 Крымінальнага кодэкса (замах на прычыненне цяжкіх цялесных пашкоджанняў групай асоб). Санкцыя артыкула прадугледжвае ад пяці да дзесяці гадоў пазбаўлення волі.