У расійскай Удмуртыі «Фламінга» паразілі завод па вытворчасці «Іскандэраў» і «Арэшніка»

• 21.02.2026, 8:59

Нанесены ўдар па ключавым прадпрыемстве расійскага ВПК.

У Рэспубліцы Удмуртыя было атакавана акцыянернае таварыства «Воткінскі завод», якое вырабляе ракетныя рухавікі для расійскіх ракет тыпу «Іскандэр» і міжкантынентальнай балістыкі (у прыватнасці для ракет «Арэшнік»), піша «Фокус».

Паводле папярэдняй інфармацыі, удар па заводзе ў Удмуртыі быў нанесены з дапамогай украінскіх ракет «Фламінга». Пра гэта вечарам 20 лютага паведамілі OSINT-аналітыкі.

Праект «КіберБорошно» піша, што «Фламінга» маглі ўдарыць па вытворчых цэхах Воткінскага завода. Аднак пакуль што афіцыйнага пацвярджэння няма.

Аналітыкі таксама пішуць, што Воткінскі завод — ключавое прадпрыемства расійскага вайскова-прамысловага комплексу (ВПК).

«Спецыялізуецца на вытворчасці балістычных ракет, у прыватнасці МБР тыпу РС-24 «Ярс» і аператыўна-тактычных комплексаў 9K720 «Іскандэр». Фактычна — адзін з базавых вытворцаў ракетнага ўзбраення стратэгічнага і аператыўнага ўзроўняў у РФ», — гаворыцца ў паведамленні.

Маштаб важнасці завода для расіян такі, што вакол яго выкопаныя рвы і абазначаны перыметр, адзначаюць OSINT-аналітыкі. Адлегласць ад мяжы Украіны да мэты — каля 1500 кіламетраў.

Тым часам Дзяніс Шціллерман, суўладальнік кампаніі Fire Point, якая вырабляе ракеты «Фламінга», на фоне навіны пра «прылёт» па заводзе ў Удмуртыі загадкава апублікаваў відэа з запускамi ракет. Ён не ўдакладніў, ці зафіксаваныя на відэароліку сённяшнія запускі па ваенных цэлях у РФ.

«Відэа без кантэксту. Кантэкст пазней», — напісаў Шціллерман.