Трамп падпісаў указ аб 10-працэнтных пошлінах для ўсіх краін свету

• 21.02.2026, 11:20

Адразу пасля рашэння Вярхоўнага суда ЗША аб незаконнасці такіх тарыфаў.

Прэзідэнт ЗША Дональд Трамп заявіў, што падпісаў новы ўказ аб 10-працэнтных пошлінах на імпарт з усіх краін свету.

Адпаведную заяву ён апублікаваў у сваёй сацыяльнай сетцы Truth Social, яе таксама размясцілі на старонках Белага дома.

Уначы па мінскім часе Трамп заявіў, што толькі што падпісаў у Авальным кабінеце ўказ аб 10-працэнтных пошлінах, якія будуць датычыцца ўсіх краін і «уступяць у сілу амаль неадкладна».

Пакуль незразумела, як гэтае новае рашэнне будзе ўзгадняцца з раней дасягнутымі двухбаковымі дамоўленасцямі.

Паводле звестак CNN, Трамп запланаваў увядзенне 10-працэнтных пошлін на 5 месяцаў на падставе асобных паўнамоцтваў, калі толькі іх не працягне Кангрэс, а за гэты час сплануе далейшыя крокі для рэалізацыі свайго бачання гандлёвай палітыкі.

Нагадаем, Вярхоўны суд ЗША 20 лютага прызнаў незаконнымі маштабныя глабальныя тарыфы прэзідэнта Дональда Трампа, якія ён абвясціў на пачатку красавіка 2025 года супраць амаль усіх краін свету.

Пасля судовага рашэння Трамп анансаваў «больш моцныя альтэрнатывы».