Контратака ЗСУ на Паўднёвым фронце: вызваленыя першыя 300 квадратных кіламетраў

• 21.02.2026, 13:16

Зяленскі ўпершыню пацвердзіў поспехі ўкраінскіх сіл.

Украінскія падраздзяленні дасягаюць поспехаў у вызваленні тэрыторый на паўднёвых участках фронту. Прэзідэнт Украіны Уладзімір Зяленскі ўпершыню пацвердзіў контратакі ЗСУ на гэтым накірунку і заявіў, што ўдалося вызваліць 300 кв. км тэрыторыі.

Пра гэта кіраўнік дзяржавы паведаміў у інтэрв'ю AFP, піша France 24.

Каментуючы трохбаковы перамоўны працэс з удзелам Кіева, Масквы і Вашынгтона аб спыненні распачатай Расіяй вайны, прэзідэнт адзначыў, што патрабаванне Крамля аб перадачы краіне-агрэсару неакупаванай часткі Данецкай вобласці з'явілася тады, калі ўкраінскія вайскоўцы развіваюць контрнаступленне на паўднёвым участку фронту.

«На сёння вызвалены 300 квадратных кіламетраў», — адзначыў лідар краіны, але не стаў удавацца ў падрабязнасці.

Як адзначаюць журналісты, перамовы пры пасярэдніцтве ЗША, што адбыліся на пачатку тыдня ў Жэневе, не прывялі да прагрэсу па ключавым пытанні тэрыторый у межах магчымай дамовы аб спыненні вайны.

У Кіеве неаднаразова падкрэслівалі, што не разглядаюць магчымасці вываду ўкраінскіх падраздзяленняў з незахопленых акупантамі тэрыторый Данеччыны.

У тым жа інтэрв'ю Зяленскі даў зразумець, што амерыканскі бок таксама аказвае ціск на Кіеў у пытанні тэрыторый. «І амерыканцы, і рускія кажуць, што калі хочаце, каб вайна скончылася заўтра, сыходзьце з Данбаса», — сказаў лідар краіны.

Акрамя таго, Вашынгтон і Масква хочуць, каб ва Украіне адбыліся прэзідэнцкія выбары ў межах плана па спыненні вайны. «Будзем шчырымі: рускія проста хочуць мяне замяніць», — дадаў кіраўнік дзяржавы.