Беларусы і іранцы падтрымалі Мікалая Статкевіча і іншых палітвязняў

• 21.02.2026, 18:12

Сумесная акцыя прайшла ў цэнтры Вільнюса.

Беларусы і іранцы падтрымалі Мікалая Статкевіча і сваіх суайчыннікаў-палітвязняў. Сумесная акцыя прайшла сёння ў цэнтры Вільнюса.

У ёй узялі ўдзел каля 50 чалавек. Удзельнікі акцыі выказалі салідарнасць са сваімі суайчыннікамі, якія знаходзяцца ў турмах на радзіме, і заклікалі краіны Захаду да больш жорсткага ціску на рэжымы Хаменеі і Лукашэнкі, паведамляе тэлеграм-канал «Баста!».

Беларусы прыйшлі на акцыю з партрэтамі лідэра апазіцыі Мікалая Статкевіча, які выйшаў з турмы пасля інсульту 19 лютага.

«Многія з удзельнікаў сённяшняй акцыі трымалі ў руках партрэты Мікалая Статкевіча. Гэта не толькі дэманстрацыя падтрымкі і шчырая радасць з нагоды яго вызвалення, але і напамін вольнаму свету: жыццё і здароўе лідэра апазіцыі – пад пагрозай. Сёння ў Беларусі адсутнічаюць праваабарончыя арганізацыі і незалежныя СМІ. Адзіная гарантыя атрымання Мікалаем Статкевічам прафесійнай медыцынскай дапамогі – гэта пастаянная ўвага з боку заходніх дыпламатаў і міжнародных арганізацый», - сказаў адзін з арганізатараў акцыі, каардынатар грамадзянскай кампаніі «Еўрапейская Беларусь» Яўген Афнагель.

«Мікалаю Статкевічу патрэбная медыцынская дапамога і рэабілітацыя пасля інсульту. Ёсць небяспека, што рэжым Лукашэнкі будзе перашкаджаць гэтаму. Ёсць небяспека, што наяўнасць або адсутнасць лекавых сродкаў стане рычагам ціску на яго або на ягоных блізкіх. Патрэбная ўвага праваабарончых арганізацый і палітыкаў да гэтай праблемы», - сказаў паплечнік Мікалая Статкевіча Сяргей Спарыш.