Уіткоф дапусціў сустрэчу Пуціна і Зяленскага

На працягу трох тыдняў.

Спецыяльны прадстаўнік прэзідэнта ЗША Стыў Уіткоф дапусціў, што сустрэча прэзідэнта Уладзіміра Зяленскага з Уладзімірам Пуціным можа адбыцца ў найбліжэйшыя тры тыдні. «Мы з Джарэдам Кушнерам настроены аптымістычна і спадзяёмся, што прапанаваныя намі ініцыятывы дапамогуць зблізіць пазіцыі бакоў на працягу найбліжэйшых трох тыдняў — і, магчыма, нават прывядуць да саміту паміж Зяленскім і Пуціным», — сказаў Уіткоф у інтэрв'ю Fox News. Ён таксама не выключыў трохбаковы фармат — з удзелам прэзідэнта Дональда Трампа.

Пры гэтым Уіткоф падкрэсліў, што Трамп не будзе ўдзельнічаць у сустрэчы, калі не ўбачыць рэальнай перспектывы яе выніку. Акрамя таго, Уіткоф нагадаў, што падвяргаўся крытыцы за частыя кантакты з Пуціным, але растлумачыў, што для падрыхтоўкі магчымай здзелкі яму было неабходна зразумець «матывы і мэты» Крэмля. «Думаю, што многія з тых сустрэч цяпер становяцца вельмі актуальнымі», — заявіў спецыяльны прадстаўнік Трампа. Усяго Уіткоф сустракаўся з Пуціным восем разоў.