У Польшчы раздадуць турыстычныя ваўчары
- 22.02.2026, 19:53
Як іх атрымаць?
Вармінска-Мазурскае ваяводства вяртаецца з праграмай «Bon Warmia Mazury 2026». Акцыя стартуе 27 лютага. У праграмы дзве мэты: падтрымаць мясцовыя гатэлі і пансіянаты па-за высокім сезонам і падштурхнуць турыстаў адкрыць для сябе Край тысячы азёр вясной. Сродкі будуць размеркаваныя ў выглядзе лічбавых бонаў, а вырашальным фактарам стане чарговасць заявак, піша The Warsaw.
Ад чаго залежыць сума ваўчара
Памер даплаты не фіксаваны. Ён залежыць ад стандарта аб’екта размяшчэння, у якім падарожнікі вырашаць правесці як мінімум дзве ночы. Чым вышэй катэгорыя гатэля, тым большая можа быць фінансавая падтрымка.
Для тых, хто не паспеюць трапіць у абмежаваны пул грашовых бонаў, прадугледжаны суцяшальны прыз — неабмежаваны зніжкавы бон, які дае права на 10% зніжку ў любым аб’екце-партнёры праграмы.
Акцыя стартуе 27 лютага 2026 года, аднак рыхтавацца варта загадзя. Сістэма выдачы бонаў працуе па прынцыпе «хто першы, той і лепшы», а досвед папярэдніх выпускаў паказвае, што ўвесь ліміт разыходзіцца за некалькі хвілін.
Агульны бюджэт падзелены на тры месяцы, што дае некалькі шанцаў атрымаць падтрымку. Больш за ўсё сродкаў — цэлы 1 мільён злотых — выдзелена на красавік.
Як аформіць турыстычны бон
Працэдура цалкам лічбавая і складаецца з некалькіх простых крокаў:
Аформіць «Kartę Sympatyka Warmii i Mazur» — гэта можна зрабіць бясплатна ў мабільным дадатку або на афіцыйным сайце рэгіёна.
Зарэгістравацца ў сістэме праграмы. З 23 лютага зайсці на сайт bonwarmiamazury.pl і стварыць уліковы запіс.
27 лютага а 11:00 трэба зайсці ў ўліковы запіс і абнавіць старонку, каб як мага хутчэй згенераваць свой унікальны бон з QR-кодам.
Паказаць бон у гатэлі. Пры засяленні ў выбраны аб’ект прад’явіць персаналу лічбавы бон — сума рахунку будзе аўтаматычна паменшана на яго намінал.
У праграмы ёсць абмежаванні, пра якія варта памятаць пры планаванні паездкі. Іх ігнараванне можа прывесці да страты бона.
Толькі прамыя браніраванні: бон нельга выкарыстоўваць, калі пражыванне было забраніравана праз пасрэдніцкія платформы, такія як Booking.com, Expedia або Airbnb. Неабходна звязвацца непасрэдна з гатэлем.
Выключаныя даты (так званыя blackout dates): праграма накіравана на падтрымку турызму ў перыяды нізкага попыту, таму бон нельга выкарыстоўваць на Вялікдзень (4–6 красавіка 2026 года) і падчас майскіх святаў (1–3 мая 2026 года).
Поўны спіс гатэляў і пансіянатаў, якія ўдзельнічаюць у акцыі, будзе апублікаваны на сайце праграмы пасля 20 лютага 2026 года.