Далёкабойныя атакі ЗСУ сталі больш паспяховымі

• 22.02.2026, 23:25

Расіяне скардзяцца, што ўкраінцы нібыта перанялі іх уласную тактыку.

Украінскія ўдары па глыбокім расійскім тыле становяцца ўсё больш выніковымі. Не ў апошнюю чаргу гэта дасягаецца дзякуючы больш актыўнаму выкарыстанню Украінай фальшывых мэтаў для знясілення расійскай СПА. Пра гэта ў сваім тэлеграм-блогу піша ўкраінскі ваенны аглядальнік Аляксандр Каваленка.

Ён звярнуў увагу, што апошнім часам расійскія «ваенкоры» і іншыя калявайсковыя спікеры скардзяцца на прымяненне Украінай «расійскай жа тактыкі» дронаў-прынад. У выніку ў большасці выпадкаў на знішчэнне фальшывай мэты расіяне выдаткоўваюць значна больш дарагія зенітныя ракеты.

У прыватнасці, акупанты налічылі ўжо як мінімум тры разнавіднасці ўкраінскіх дронаў-прынад — «Майя», «Рубака» і «ХаКі-20».

Як адзначае Каваленка, вялікая колькасць фальшывых мэтаў у ўмовах, калі мабільныя агнявыя групы і разлікі зенітных комплексаў маюць абмежаваныя магчымасці для візуальнай ідэнтыфікацыі мэтаў, прыводзіць да перагрузкі і знясілення сродкаў СПА блізкага радыюсу дзеяння.

«Відавочна, што выніковасць удараў па тэрыторыі Расіі ў апошнія месяцы дасягнутая не толькі дзякуючы маштабаванню прымянення ўдарных дронаў і знясіленню расійскай СПА, але і актыўнаму выкарыстанню прынад», — дадае аналітык.