Мінчанка зняла кватэру ў Уруччы і выставіла яе на продаж

• 23.02.2026, 17:50

Чым скончылася гэтая гісторыя?

Набыццё кватэры — працэдура не столькі складаная, колькі хвалюючая. Усё ж на коне вялікія (а часам вельмі вялікія) грошы. Аднак некаторыя людзі да гэтага кроку ставяцца легкадумна. Навошта правяраць дакументы? Звяртацца ў агенцтвы? Можна ж усё вырашыць наўпрост і без лішняй мітусні. Праўда, здзелкі, заснаваныя на сумленным слове, звычайна заканчваюцца не вельмі добра.

Усё пачалося яшчэ летась. 46-гадовая мінчанка (раней неаднаразова судзімая) вырашыла, што для сапраўднага шчасця ёй не стае грошай. Пайсці працаваць? Якая дурнота. Замест гэтага жанчына прыдумала каварны план. Яна зняла кватэру на вуліцы Шугаева і… адразу ж выставіла яе на продаж. Пакупнікі знайшліся хутка — імі стала сямейная пара з Ліды.

Як паведамляе агенцтва «Мінск-Навіны», са студзеня па верасень 2025 года сужэнцы ў некалькі этапаў перадавалі мінчанцы грошы — усяго 56 157 рублёў.

Падставы агучваліся самыя розныя: унясенне перадплаты, аплата паслуг па аперацыях з нерухомасцю, таксама сужэнцы пазычалі мінчанцы буйныя сумы нібыта на лячэнне.

Калі пацярпелыя нарэшце зразумелі, што іх падманваюць і здзелка не адбудзецца, звярнуліся ў міліцыю. Асобу злачынніцы ўстанавілі, у дачыненні да яе ўзбудзілі чарговую крымінальную справу.

— Абвінавачаная раней пяць разоў прыцягвалася да крымінальнай адказнасці, у тым ліку за здзяйсненне аналагічных злачынстваў, мае не знятую і не пагашаную ў вызначаным законам парадку судзімасць, — распавёў намеснік пракурора Кастрычніцкага раёна Юрый Совловец. — Ёй прад’яўлена абвінавачанне ў завалоданні маёмасцю шляхам злоўжывання даверам (махлярстве), здзейсненым паўторна, у асабліва буйным памеры, то бок у здзяйсненні злачынства, прадугледжанага ч. 4 арт. 209 КК, санкцыя якой — пазбаўленне волі на тэрмін ад 3 да 12 гадоў са штрафам. У дачыненні да абвінавачанай ужыта мера стрымання ў выглядзе заключэння пад варту.

Махляры і махляркі сапраўды вакол нас. І не па адной. Некалькі гадоў таму мы распавядалі вам гісторыі, якія заварыла «Лена-бяда». Судзячы па ўзросце, цяпер ваду муціць не яна, але нагадаць і пра яе «подзвігі» будзе не лішнім.