ЗША выводзяць сілы з асноўнай базы на паўночным усходзе Сірыі

• 23.02.2026, 17:41

Калоны тэхнікі заўважылі ў раёне правінцыі Хасаке.

Злучаныя Штаты нібыта пачалі выводзіць сваіх вайскоўцаў з асноўнай базы на паўночным усходзе Сірыі.

Пра гэта са спасылкай на крыніцы паведамляе Reuters.

Паводле звестак трох крыніц у ваенных і праваахоўных структурах Сірыі, амерыканцы 23 лютага пачалі выводзіць сілы з найбуйнейшай базы ЗША на паўночным усходзе краіны — у горадзе Касрак правінцыі Хасаке.

Агенцтва таксама атрымала відэазапіс, на якім грузавікі рухаюцца па трасе паблізу горада.

У Цэнтральным камандаванні ЗША пакуль не каментавалі гэтую інфармацыю.

Касрак быў асноўным хабам для кааліцыі саюзнікаў пад кіраўніцтвам ЗША для супрацьдзеяння «Ісламскай дзяржаве».

У выпадку поўнага вываду амерыканскіх сіл з гэтай базы ў рэгіёне застанецца яшчэ адна база кааліцыі пад кіраўніцтвам ЗША — у горадзе Рмелан каля мяжы з Іракам.

Адзін з сірыйскіх суразмоўцаў паведаміў, што планы ЗША прадугледжваюць вывад сіл на працягу месяца, але пакуль незразумела, ці з'яўляецца гэта часовай мерай ці канчатковай. Іншы суразмоўца таксама сказаў, што вывад сіл працягнецца некалькі тыдняў.

З таго часу, як у студзені ўрадавыя сілы цяперашняй сірыйскай улады ўзялі пад кантроль паўночна-ўсходнія рэгіёны Сірыі, ЗША вывелі свае войскі з базы аль-Шададзі ў правінцыі Хасаке, а таксама гарнізон у горадзе аль-Танф на стыку межаў Сірыі з Іракам і Іарданіяй.

Неназваны суразмоўца з ЗША пракаментаваў Reuters, што вывад амерыканскіх сіл адбываецца ў межах «прадуманага і заснаванага на ўмовах» пераходнага перыяду. У ЗША лічаць, што цяпер ім не абавязкова прысутнічаць у Сірыі ў ранейшых маштабах «урахоўваючы гатоўнасць сірыйскіх уладаў браць на сябе першачарговую адказнасць за барацьбу з тэрарыстычнай пагрозай у межах сваіх граніц».