У Беларусі нявеста прывяла ў ЗАГС адразу двух жаніхоў

• 23.02.2026, 19:51

Незвычайная гісторыя заключэння шлюбу адбылася ў Гомелі.

У Гомелі нявеста прывяла ў ЗАГС адразу двух жаніхоў, напісала «Праўда Гомель».

Незвычайную гісторыю заключэння шлюбу, што адбылася некалькі гадоў таму, расказала галоўны спецыяліст аддзела ЗАГСа Гомельскага гарвыканкама Жанна Ігнатэнка. Падаваць заяву ў ЗАГС прыйшла пара: шчаслівы жаніх і нявеста ў масіўных сонцаахоўных акулярах, якая відавочна хвалявалася.

– У мяне добрая зрокавая памяць на твары. Я адразу зразумела, што гэтая дама мне знаёмая, — успомніла спецыяліст ЗАГСа.

Нявеста спрабавала замаскіравацца, запаўняючы бланкі, а ў гэты час Жанна Ігнатэнка праверыла базу і пераканалася, што тая ж дзяўчына тыдзень таму ўжо падала заяву на рэгістрацыю шлюбу, але з іншым мужчынам.

Паводле закона падаваць заявы з рознымі партнёрамі не забаронена. І ўсё ж супрацоўніца ЗАГСа папрасіла жаніха выйсці, а сама пагаварыла з нявестай. Дзяўчына моцна збянтэжылася, але сказала, што яе канчатковы выбар — другі жаніх, які чакае ў холе.