У Мінску спыніліся тролейбусы і трамваі на некалькіх вуліцах

• 23.02.2026, 20:32

Што адбылося?

Увечары 23 лютага Мінск сутыкнуўся з транспартнымі праблемамі. Спачатку горад скавалі заторы, а затым на некалькіх вуліцах адбыліся аварыі на кантактнай сетцы і ДТЗ, якія паралізавалі рух тролейбусаў і трамваяў, піша агенцтва «Минск-Новости».

Паводле звестак сэрвісу «Яндекс.Пробки», загружанасць дарог у сталіцы на вечар ацэньваецца ў 5 балаў — рух у горадзе істотна ўскладнены.

Паводле інфармацыі «Минсктранса», з-за вялікай колькасці аўтамабіляў запаволіўся рух на двух участках:

Вуліцы Сурганава і Акадэмічная: тут транспарт адставаў ад графіка на 20 хвілін.

Вуліца Кальварыйская: заторы таксама дадавалі вадзіцелям да 20 хвілін затрымкі.

Каля паловы сёмай вечара сітуацыя пагоршылася. Спачатку а 18:29 адбылося пашкоджанне кантактнай сеткі на вуліцы Кальварыйскай і ў Тучынскім завулку. Рух спыніўся ў абодвух напрамках. З-за гэтага сталі тролейбусы маршрутаў №7, 9, 13 і 44.

Літаральна праз тры хвіліны, а 18:32, яшчэ адна аварыя здарылася ў цэнтры горада — на вуліцах Няміга і Мяснікова (у напрамку плошчы Бангалор). Там таксама была пашкоджаная кантактная сетка, і сталі тролейбусы маршрутаў №29, 37 і 53.

А 18:33 да транспартных праблем дадалася новая — на вуліцах Якуба Коласа і Някрасава (у напрамку вуліцы Чырвоная) адбылася аварыя, з-за якой спыніўся рух трамваяў. Сталі маршруты №1, 5, 6 і 11.

Рух часткова перанакіравалі:

Трамваі №5 курсуюць толькі да прыпынку «РК «Змітрака Бядулі».

Трамваі №1 і №6 даязджаюць толькі да дыспетчарскай станцыі «Возера».