Пачашчыліся выпадкі адмовы грамадзянам Беларусі ва ўездзе ў Ізраіль
- 23.02.2026, 21:32
Пасольства Беларусі апублікавала рэкамендацыі.
Пра пачашчэнне выпадкаў адмовы грамадзянам Беларусі ва ўездзе ў Ізраіль паведаміла Пасольства Беларусі ў гэтай краіне.
У сувязі з гэтым дыпмісія апублікавала шэраг рэкамендацый.
Перад паездкай неабходна аформіць дазвол праз сістэму абавязковага папярэдняга паведамлення (ETA-IL) Упраўлення па пытаннях рэгістрацыі насельніцтва і іміграцыі Ізраіля. Дазвол не з'яўляецца гарантыяй права на ўезд, а пацвярджае права на прыбыццё да пункта прапуску. Канчатковае рашэнне аб допуску на тэрыторыю Ізраіля прымае памежная служба.
Пры запаўненні анкеты неабходна праўдзіва і дакладна ўказваць усе звесткі. Любыя разыходжанні паміж раней прадстаўленай інфармацыяй і адказамі падчас праходжання памежнага кантролю могуць пацягнуць адмову ва ўездзе.
Працоўная дзейнасць у Ізраілі дазваляецца толькі пры наяўнасці адпаведнай працоўнай візы. Спробы выкарыстоўваць турыстычную паездку для пошуку працы або наступнага працаўладкавання «з'яўляюцца адной з асноўных прычын адмоваў ва ўездзе», падкрэслівае пасольства.
Таксама варта ўлічваць, што ізраільскія органы бяспекі аналізуюць інфармацыю комплексна, у тым ліку з адкрытых крыніц. Публічныя звесткі пра намер працаўладкавацца або доўга пражываць у Ізраіле могуць стаць падставай для дадатковых праверачных мерапрыемстваў.
Рэкамендуецца загадзя падрыхтаваць пацвярджэнне браніравання і аплаты пражывання, зваротны білет, медыцынскую страхоўку, дастатковыя фінансавыя сродкі на ўвесь тэрмін знаходжання, а таксама дакладна ведаць мэту паездкі, маршрут і тэрміны знаходжання ў краіне. У выпадку прыватнага візіту мэтазгодна мець пісьмовае запрашэнне прымаючага боку, копію пасведчання асобы і кантактныя даныя запрашаючага.
Ізраільскія памежныя органы маюць права праводзіць субяседаванне для ўдакладнення мэты візіту, месца пражывання, крыніц даходу, наяўнасці пастаяннай працы або вучобы, іншых устойлівых сацыяльных і эканамічных сувязяў з Беларуссю. Таму рэкамендуецца пацвердзіць наяўнасць такіх сувязяў (даведка з месца працы, пацвярджэнне навучання, дакументы на маёмасць, звесткі пра сямейны стан і інш.).
Калі грамадзянін раней знаходзіўся ў Ізраілі блізка да максімальна дапушчальнага тэрміну і хутка зноў плануе ўезд, гэта можа выклікаць дадатковыя пытанні адносна рэальнай мэты знаходжання.
Падкрэсліваецца, што прадастаўленне недакладнай інфармацыі, супярэчлівыя адказы, утаенне сапраўдных намераў або адмова ад супрацоўніцтва з супрацоўнікамі памежнай службы, як правіла, прыводзяць да адмовы ва ўездзе.
У выпадку паездкі да грамадзяніна Ізраіля або да асобы, якая знаходзіцца ў працэсе атрымання статусу (грамадзянства, натуралізацыі і г.д.), могуць прымяняцца дадатковыя дазвольныя працэдуры.
Для пілігрымскіх паездак рэкамендуецца звяртацца ў пілігрымскі аддзел Мінскай епархіі або пілігрымскі аддзел Рускай духоўнай місіі ў Ізраіле.
Пасольства папярэджвае ад карыстання паслугамі пасярэднікаў, якія прапануюць гарантаваны ўезд або працаўладкаванне пад выглядам турыстычнай паездкі, і падкрэслівае, што наяўнасць зваротных білетаў і пацверджанага пражывання само па сабе не з'яўляецца гарантыяй прапуску на тэрыторыю краіны.
Пагадненне аб бязвізавых паездках паміж Беларуссю і Ізраілем прадугледжвае магчымасць знаходжання грамадзян Беларусі на тэрыторыі гэтай краіны да 90 дзён на працягу кожнага перыяду 180 дзён без афармлення візы.